Mu rukerera rwo kuri uyu wa Kane, tariki 24/07/2025 mu gihugu cy’u Burusiya habaye impanuka ikomeye y’indege y’abagenzi yahitanye abantu 48 bose bari bayirimo.
Iyo ndege yari mu rugendo ubwo yavaga mu mujyi umwe ijya mu wundi imbere mu gihugu, ariko ntiyigeze igera aho yagombaga kugera kuko yakoreye impanuka mu nzira.
Inzego z’ubuyobozi bw’u Burusiya zatangaje ko iyo ndege yagiriye ibibazo bikomeye mu kirere, bituma yisenyura k’ubutaka, ikora impanuka ikomeye yahise ihitana ubuzima bw’abantu bose 48 bari bayirimo.
Abayobozi batangaje ko mbere y’uko igwa, abapilote bagerageje kuyisubiza ku butaka nyuma yo gutakaza ubushobozi bwo kuguma mu kirere, ubwo yageragezaga kugwa, yahise icikamo ibice, maze irashya irakongoka.
Abaturage bo mu gace iyi ndege yaguyemo bavuze ko bumvise urusaku rukomeye, hakurikiraho umuriro n’umwotsi mwinshi. Imodoka z’abashinzwe kuzimya umuriro, abaganga ndetse n’inzego z’umutekano bahise batabara, ariko birangira nta muntu n’umwe ubashije kurokoka.
Inzego z’ubuyobozi zatangaje ko hatangiye iperereza ryimbitse kugira ngo hamenyekane impamvu yateye iyo mpanuka. Ibyo bikorwa bikaba birimo gukorwa n’inzobere mu bwikorezi bwo mu kirere, abatekinisiye n’inzego z’umutekano.
Ibikorwa byo gushakisha ibisigazwa by’abari mu ndege na byo byahise bitangira, hagamijwe gufasha gushyingurwa mu cyubahiro abahitanwe n’ iyi mpanuka. Imiryango yabuze ababo nayo ikomeje guhabwa ubufasha bw’ihumure n’inkunga zinyuranye.
Iyi mpanuka yatumye umutekano w’ingendo zo mu kirere wongera kuba impamvu y’impaka. Abashinzwe iby’indege basabwe kongera gusuzuma uburyo bwo kwita ku ndege, kuzigenzura neza mbere yo guhaguruka, no guhugura abakozi mu buryo buhoraho.
Ubuyobozi bw’u Burusiya bwasabye abaturage gukomeza kwihangana, no kwirinda gukwirakwiza amakuru atizewe mu gihe hategerejwe ibisobanuro by’ukuri bizava mu iperereza.
