Indege ebyiri z’igisirikare cya Leta zunze ubumwe za Amerika (USA) zagonganiye mu kirere cyo mu mujyi wa Dallas muri leta ya Texas kuri uyu wa 12 Ugushyingo 2022.
Izi ndege: Boeing B-17 Flying Fortress na Bell P-63 Kingcobra zagonganye ubwo zari mu myiyerekane y’izifashishijwe mu ntambara ya kabiri y’Isi yabaye kuva mu mwaka w’1939 kugeza mu 1945.
Ikinyamakuru CBS gisobanura ko igongana ry’izi ndege zarimo abantu batanu (B-17 yarimo bane, Kingcobra irimo umupilote umwe), yatumye zitura hasi, ziragurumana.
Meya wa Dallas, Eric Johnson amaze kubona iyi mpanuka, yasabye Abanyamerika gusengera abari bayirimo. Ati: “Amashusho akura umutima. Ndabinginze nimusengere roho z’abafashe ikirere kugira ngo bashimishe kandi bigishe imiryango yacu uyu munsi.”
Iyi myiyerekano yabereye hafi y’ikibuga cy’indege cya Dallas Executive imara iminsi itatu, ikaba mu rwego rwo guha icyubahiro abasirikare barwaniye igihugu mu ntambara ya kabiri y’Isi.
