Ku itariki ya 30 Ukwakira 2025, Inteko Ishinga Amategeko y’u Burayi (European Parliament) yatangaje ko amatora rusange yo muri Tanzania atabaye mu buryo buboneye, ivuga ko “ataranzwe n’ubwisanzure n’ubutabera.”
Mu itangazo ryasohowe n’abadepite bayo (MEPs), bavuze ko amatora yagombaga kuba umunsi w’ibyishimo bya demokarasi, ariko ahubwo ahinduka “igihe cy’igitutu, ubwoba n’iterabwoba.”
Itangazo ryabo rigira riti: “Ibyo byabaye si amatora yisanzuye kandi atabogamye. Uburiganya ntabwo bwatangiriye ku isanduku y’itora, bwatangiye amezi menshi mbere y’amatora.”
Abadepite b’u Burayi bashimangiye ko hari kwibasirwa kw’abatavuga rumwe na Leta, harimo kubafata, kubafunga, no kubuza amashyaka yabo gukorera mu bwisanzure.
Bavuze by’umwihariko ku rubanza rwa Tundu Lissu, umuyobozi w’ishyaka ritavuga rumwe na Leta uri kuburanishwa ku cyaha cya “kurwanya ubutegetsi” kubera gusaba amatora atabogamye.
“Tundu Lissu agomba gufungurwa ako kanya.” ni ko itangazo ryagaragaje.
Inteko y’u Burayi ivuga ko nta matora ashobora gufatwa nk’afite agaciro mu gihe abatavuga rumwe na Leta bafungwa, ubwisanzure bwo gutanga ibitekerezo bukumirwa, ndetse itangazamakuru ryigenga rihatirwa guceceka.
“Raporo zigaragaza amakosa mu matora, kwirukanwa kw’abagenzuzi, n’ihohoterwa ry’abavuga ukuri byononnye icyizere cy’iki gikorwa cya demokarasi,”
Abagize Inteko basoje bavuga ko amahanga adakwiye guceceka: “Dusaba abafatanyabikorwa bose ba demokarasi guhagarara kigabo mu kurengera uburenganzira bwa muntu n’amahame ya demokarasi. Kurebera ntacyo ukora si ukwifata, ni ugufatanya n’ibibi.”
Iri tangazo ryashyizweho umukono na: David McAllister, Perezida w’akanama k’ububanyi n’amahanga mu Nteko Ishinga Amategeko y’u Burayi, Mounir Satouri, Perezida w’akanama k’uburenganzira bwa muntu, Merja Kyllönen, Perezida w’itsinda rishinzwe umubano n’Inteko Nyafurika.
Iri tangazo rije rikurikiye iminsi y’ubushyamirane n’imyigaragambyo muri Tanzania, aho abaturage n’amahanga bakomeje kuvuga ko amatora yabaye mu buryo budahwitse kandi butubahiriza amahame ya demokarasi.
