Igisirikare cyihariye cya Iran cyatangaje ko hari abandi basirikari bakuru b’ abajenerali batandatu biciwe mu gitero bagabweho na Isirayeli bikaba byongereye umubare w’abayobozi bakuru b’igisirikare cya Iran bamaze kugwa muri ibi bitero bya Israel bababa bageze kuri 16.
Mu bishwe harimo amazina akomeye cyane mu buyobozi bw’ingabo za Iran, barimo Hossein Salami, wari umugaba mukuru w’igisirikare cyihariye cya (Islamic Revolutionary Guard Corps,(IRGC), hamwe na Jenerali Mohammad Bagheri, wari umuyobozi Mukuru w’ingabo z’igihugu.
Nk’uko byatangajwe n’ibiro ntaramakuru bya Tasnim, bifitanye umubano wa hafi n’icyo gisirikare, imihango yo gushyingura aba bayobozi bakuru barimo Salami, Bagheri n’abandi iteganyijwe kuwa kabiri w’ iki cyumweru dutangiye.
Aba bajenerali bishwe mu minsi itatu y’ibitero bya Israel byo mu kirere, byibasiye ibice bitandukanye bya Iran. Ibitero bikaba byaribanze ku nganda za Nikereyeli, ibigo bikomeye by’igisirikare, imijyi, ibikorwaremezo by’umutekano, hamwe n’iby’ubucukuzi bwa peteroli.
Guverinoma ya Iran yamaganye ibi bitero ikabifata nk’ubushotoranyi bugamije gushoza intambara ku gihugu cya Iran, maze nayo bituma iyisubiza isuka ibisasu byinshi by’intambara n’indege zitagira abapilote (drones) ku butaka bwa Israel.
Mu bitero byabaye mu byumweru bishize, Israel yatangaje ko abantu 10 ari bo bahitanywe n’iyo ntambara yo kwihorera kwa Iran.
Ubuyobozi bwa Iran buravuga ko butazihanganira ko ubusugire bw’igihugu cyabwo bwibasirwa, mu gihe impungenge zikomeje kuba nyinshi ku mpande zombi ko iyi ntambara ishobora kuba iya gatau y’ isi yose gusunika akarere kose mu mpande zose zaba iza politiki ndetse n’ubukungu.
