Mu butumwa ku rubuga rwacyo rwa Telegramu, Igisirikare cya Israel (IDF) cyavuze ko kishe komanda wa Hezbollah witwa Abu Ali Rida. Cyavuze ko yategekaga agace ka Baraachit mu majyepfo ya Libani.
IDF yamusobanuye nk’umuntu wari “ufite inshingano zo gutegura no gushyira mu bikorwa ibitero bya roketi na misile ku Ngabo za IDF.”
Mu makuru mashya cyagize kiti: “Ingabo za IDF zikomeje kugaba ibitero bike, by’ibanze mu majyepfo ya Libani, zisenya ibikorwa remezo by’abaterabwoba, gushakisha intwaro, no kurandura abaterabwoba.
Umubare munini w’abaturage ba Libani bakuwe mu byabo kubera ibikorwa bya gisirikare bya Israel byibasira Hezbollah. Abayobozi ba Libani bavuga ko muri Libani abantu barenga 2.800 baguye mu bitero bya Israel. Ibihumbi n’ibihumbi by’Abisiraheli mu majyaruguru y’igihugu na bo bimuwe mu byabo n’ibisasu bya rokete bya hato na hato bya Hezbollah n’indi mitwe irwanya Israel muri Libani.
