Luteni Jenerali Franck Ntumba, kiongozi wa operesheni za kijeshi katika ofisi ya Rais Félix Antoine Tshisekedi wa Jamhuri ya Kidemokrasia ya Kongo, ameripotiwa kutiwa mbaroni kulingana na taarifa kutoka nchini humo.
Ripoti zinaonyesha kuwa Jenerali huyo alikamatwa siku ya Jumatano, tarehe 16 Julai, kabla ya kuhojiwa na Baraza la Usalama wa Taifa (CNS) la DRC.
Inasemekana kuwa Ntumba, kama maafisa wengine wa kijeshi waliokamatwa hivi karibuni, anachunguzwa kwa madai ya kupanga njama ya kumpindua Rais Félix Antoine Tshisekedi. Hata hivyo, taarifa nyingine zinasema anaweza pia kuwa anachunguzwa kwa tuhuma za ubadhirifu wa fedha nyingi.
Lt. Jen. Franck Ntumba alikamatwa miezi sita baada ya Rais Tshisekedi kupokea taarifa kuwa kuna mpango wa mapinduzi dhidi yake.
Shirika la habari la Uingereza Reuters hivi karibuni liliripoti kuwa mfanyabiashara mwenye uraia wa Israeli na Marekani, Moti Kahana, ndiye aliyemjulisha Tshisekedi kuhusu njama hiyo ya kumpindua, iliyopangwa na Ntumba kwa kushirikiana na baadhi ya Waisraeli. Walikutana katika Mkutano wa Uchumi Duniani uliofanyika Davos, Uswisi mnamo Januari mwaka huu.
Kukamatwa kwa Lt. Jen. Ntumba kunaongeza idadi ya maafisa wakuu wa kijeshi waliokamatwa, wakiwemo Lt. Jen. Jean-Claude Yav Kabeya aliyekuwa kiongozi wa operesheni za kijeshi katika ofisi ya Tshisekedi (na ambaye alifuatwa na Ntumba mnamo 2023), Jen. Christian Tshiwewe Songesa, aliyekuwa Mkuu wa Majeshi ya DRC, na Meja Jenerali Maurice Nyembo aliyekuwa mkurugenzi wa ofisi ya Tshiwewe.
Katibu Mkuu wa chama tawala UDPS, Augustin Kabuya, hivi karibuni alithibitisha kuwa Tshiwewe alikuwa na nia ya kumuua Rais Tshisekedi, jambo ambalo alilikiri wakati wa mahojiano na CNS.
