Umuyobozi w’umutwe w’abasirikare bashinzwe kurinda Perezida Félix Antoine Tshisekedi wa Repubulika Iharanira Demokarasi ya Congo, yibasiye Joseph Kabila Kabange wahoze ari Perezida wa kiriya gihugu, agaragaza ko akwiye urupfu.
Général-Major Ephraïm Kabi Kiriza yibasiye Kabila ku wa Gatatu tariki ya 28 Gicurasi, ubwo we n’abasirikare ayoboye bari bahuriye mu kigo cya gisirikare cya Camp Colonel Tshatshi.
Uyu Jenerali yasabye abasirikare ayoboye kwima amatwi ababeshya, by’umwihariko abanyapolitiki babakoresha mu nyungu zabo bwite.
Ati: “Umuntu wese ukunda igihugu ntashobora gutegura gucamo ibice (Balkanisation) iki gihugu. Ntashobora kwemera kugurwa n’abanyapolitiki b’ababeshyi bafashe inzira idakwiye.”
Yabibukije kandi ko mu ndahiro isanzwe iranga ingabo za Repubulika Iharanira Demokarasi ya Congo ari “kutagambanira na rimwe Congo”.
Mu banyapolitiki uyu musirikare yikomemye cyane harimo Joseph Kabila umaze igihe gito atahutse mu gihugu, nyuma y’umwaka urenga aba mu buhungiro.
Kabila mu ijambo aheruka kugeza ku banye-Congo, yavuze ko yasigiye RDC igisirikare gikomeye gusa kuri ubu kikaba gisa n’icyasenyutse kubera kuyoborwa nabi.
Géneral Kabi Kiriza asa n’umusubiza, yamushinje kuba akiva ku butegetsi yarasize abasigayemo ibirarane by’imishahara ndetse n’uduhimbazamusyi, gusa ku butegetsi bwa Tshisekedi bikaba bitandukanye.
Ati: “Joseph Kabila yajyanye ibirarane byacu, n’uduhimbazamusyi twacu. Yasize nta mavuriro n’ibitaro tugira. Nareke kubeshya. Ku bwa Tshisekedi nta birarane dufite.”
Yunzemo ko Joseph Kabila adakwiye kuvuga ku gisirikare cya RDC, ngo kuko ntacyo yigeze akimarira.
Ati: “Kabila avuga ko yatuyoboye mu mirwano, ariko se iyihe mirwano? Kabila nta na rimwe yigeze arwana hamwe n’igisirikare, yemwe no mu gihe twari mu cyunamo. Mu gihe cyose yamaze ku butegetsi, nta na rimwe yanigeze akandagira muri Camp Tshatshi “.
Kugeza ubu Joseph Kabila aregwa na Kinshasa ibyaha birimo ubugambanyi, bikaba bishingiye ku kuba yaragiye mu mujyi wa Goma nyamara ugenzurwa na M23 bahanganye.
Général-Major Ephraïm Kabi Kiriza asa n’umukomozaho, yashimangiye ko umugambanyi wese akwiye kwicwa.
Ati: “Umushahara w’ubugambanyi ni urupfu, kubera ko igihugu kitababarira na rimwe umugambanyi.”
Kabi Kiriza kandi yasabye abajepe ayobora gukomeza kuba inkoramutima za Tshisekedi, abibutsa ko mu byo biyemeje harimo no gupfa ku bwe.
