Aliyekuwa Rais wa Marekani, Joe Biden mwenye umri wa miaka 82, amegunduliwa kuwa na saratani ya tezi dume ambayo tayari imesambaa hadi kwenye mifupa, kulingana na taarifa kutoka ofisi yake iliyotolewa Jumapili tarehe 18 Mei 2025.
Biden alikwenda hospitalini baada ya kupata dalili zinazohusiana na mfumo wa mkojo. Uchunguzi wa kitabibu ulibaini kuwa ana aina kali ya saratani ya tezi dume yenye alama 9 kati ya 10 kwenye kipimo cha Gleason – ishara kwamba saratani hiyo inaweza kuenea kwa haraka. Madaktari walisema saratani hiyo inaitikia homoni, jambo linaloifanya iweze kutibika kwa mafanikio.
Rais Biden na familia yake kwa sasa wanajadili mbinu bora ya matibabu. Kuna taarifa kuwa matibabu yatazingatia tiba ya homoni ili kupunguza kasi ya ukuaji wa saratani hiyo.
Wanasiasa wengi wametuma salamu za pole na matumaini ya kupona haraka kwa Biden, akiwemo Donald Trump, aliyemtangulia, Kamala Harris aliyekuwa makamu wake wa rais, na Barack Obama ambaye walifanya naye kazi kwa muda mrefu.
Saratani ya tezi dume ni ya pili kwa kuathiri wanaume zaidi nchini Marekani, ikitanguliwa na saratani ya ngozi. Wataalamu wanasema kuwa ikishafika kwenye mifupa haiwezi kupona kabisa, lakini mgonjwa anaweza kuishi miaka mingi kutegemea matibabu anayopewa.
Rais Biden aliwahi kumpoteza mwanawe Beau Biden mwaka 2015 kutokana na saratani ya ubongo, jambo lililomsukuma kuhimiza utafiti wa saratani. Mnamo 2016, aliongoza mpango uitwao Cancer Moonshot uliolenga kutafuta tiba ya kudumu ya saratani.
