Serikali ya Jamhuri ya Kidemokrasia ya Kongo (DRC) imedai kuwa Rwanda ilikuwa na mpango wa kumuua Rais Félix Antoine Tshisekedi, lakini Rais wa zamani Joseph Kabila Kabange alishauri dhidi ya kutekelezwa kwa mpango huo.
Kauli hii ilitolewa na Mkaguzi Mkuu wa Mahakama ya Kijeshi ya Kongo wakati wa kikao na Seneti siku ya Ijumaa, ambapo aliomba kuondolewa kwa kinga ya Kabila ili kuruhusu mashitaka kuendelea dhidi yake.
Kinshasa imeanzisha hatua za kisheria dhidi ya Joseph Kabila, ikimshutumu kwa kushirikiana na kundi la waasi la M23, ambalo kwa sasa linapigana na serikali ya Kongo.
Kwa kuwa Kabila alihudumu kama rais kwa miaka 18 na kisha kuteuliwa kuwa seneta wa maisha, sheria inahitaji kinga yake kuondolewa kabla ya mashitaka yoyote kuanza.
Luteni Jenerali Lekulia Bakuma Lucien-René, akihutubia maseneta, aliwasilisha madai ya ushirikiano kati ya Kabila, M23, na Rwanda kama sababu kuu za kuondoa kinga yake.
Alidai kuwa na ushahidi unaoonyesha kuwa Joseph Kabila amekuwa akitoa msaada kwa kundi hilo la waasi.
Aidha, Jenerali Bakuma alisema kuwa Kabila na Rwanda walihusika katika njama ya kumpindua Rais Tshisekedi. Taarifa hizi ziliripotiwa kupatikana kutoka kwa Eric Nkuba, afisa wa zamani wa juu wa M23, ambaye alikamatwa Tanzania na kukabidhiwa kwa mamlaka ya Kongo.
Wakati wa mahojiano, Nkuba alidaiwa kufichua kuwa Rwanda ilikuwa na mpango wa kumuua Rais Tshisekedi, lakini Kabila alishauri dhidi ya hilo ili kuepuka Tshisekedi kuwa shujaa wa taifa.
Jenerali Bakuma alielezea njama hiyo akisema: “Wakati wa mahojiano, Eric Nkuba alitaja kuwa mnamo Mei 15, 2023, huko Kampala, alisikia seneta wa maisha akizungumza na Corneille Nangaa (mratibu wa AFC/M23) kuhusu mpango wa Rwanda wa kumuua Rais wa Jamhuri ya Kidemokrasia ya Kongo, Mheshimiwa Félix Antoine Tshisekedi Tshilombo. Hata hivyo, [Kabila] alishauri dhidi ya kutekelezwa kwa mpango huo, akipendekeza kuwa mhanga aliyelengwa angekuwa shujaa wa kitaifa.”
Kabila aliripotiwa kupendekeza kuwa ingekuwa na busara zaidi kumuondoa Tshisekedi madarakani kupitia mapinduzi ya kijeshi.
Mashtaka dhidi ya Joseph Kabila ni pamoja na kushiriki katika njama ya kuipindua serikali, uhaini, na kushiriki katika uhalifu wa kivita na uhalifu dhidi ya ubinadamu.
