Kalisa Adolphe ’Camarade’ wahoze ari Umunyamabanga Mukuru w’Ishyirahamwe ry’Umupira w’Amaguru mu Rwanda (FERWAFA), agiye kugezwa imbere y’ubutabera.
Kuri uyu wa Gatanu tariki ya 19 Nzeri ni bwo Camarade azatangira kuburana ku ifunga n’ifungurwa ry’agateganyo, mu Rukiko rw’Ibanze rwa Gasabo.
Akurikiranyweho ibyaha byo kunyereza umutungo, ruswa no gukoresha inyandiko mpimbano.
Kalisa yatawe muri yombi n’Urwego rw’Igihugu rw’Ubugenzacyaha ku wa 14 Nzeri, ubwo hakorwaga iperereza ry’ibanze ryagaragaje ko hari impamvu zikomeye zituma akekwaho ibyaha.
Uyu mugabo umaze iminsi afungiye kuri Sitasiyo ya RIB ya Remera, yafatanwe na Tuyisenge Eric ‘Cantona’ usanzwe ashinzwe ibikoresho by’amakipe y’Igihugu.
