Umuhanzi Kevin Kade yasuzuguye itangazamakuru ubwo yataramiraga mu gitaramo cya Minuza Festival cyabereye ku kibuga cy’umupira w’amaguru cya Kaminuza y’u Rwanda, ishami rya Huye.
Itangazamakuru ry’imyidagaduro ryo mu Ntara y’Amajyepfo ryamushinje “agasuzuguro” kubera uburyo yitwaye ku rubyiniro no mu gihe nyuma y’igitaramo.
Iki gitaramo cyari cyateguwe na Banki y’Iterambere y’u Rwanda (BRD), kigamije gusobanurira abanyeshuri no gukemura ibibazo bijyanye n’amafaranga y’inkunga bahabwa na banki binyuze mu gikorwa cya Minuza.
Abanyamakuru bahamya ko Kade yasabwe inshuro ebyiri kuganira n’itangazamakuru, ariko ahita yinjira mu modoka atabavugishije. Muhire Gilbert wo kuri Radio Salus yavuze ko ibyo byateje umwuka mubi ndetse bamwe mu bari aho bakaba barabonye bamenwaho inzoga mu buryo butari bwiza.
Yakomeje agira ati: “Si twebwe gusa baba basuzuguye, ahubwo ni n’abafana babo bashaka kumenya amakuru, ndetse no gusuzugura uruhare rw’itangazamakuru mu guteza imbere muzika nyarwanda. Agomba gusaba imbabazi mu ruhame.”
Ku ruhande rwa Kade, Ghislain Nise Jabo, umuyobozi ureberera inyungu ze, yavuze ko ibyabaye byatewe no gushyuha mu mutwe no gukemanga ibyuma by’amajwi byari byateye ikibazo mbere y’uko umuhanzi agera ku rubyiniro.
Yemeza ko nta bugome cyangwa kubasuzugura kwabayeho, ahubwo byari ikosa ryabaye mu bwumvane.
Jabo yakomeje avuga ko itangazamakuru rihora ari abafatanyabikorwa ba buri gihe kandi ko uyu mwanya wari uwateganyijwe gutangaza indirimbo nshya ya Kade yitwa Nyiragongo.
