Ishyaka Leadership et Gouvernance pour le Développement (LGD), riravuga ko umuyobozi waryo muri Repubulika Iharanira Demokarasi ya Congo, Augustin Matata Ponyo yaburiwe irengero.
Matata Ponyo yabaye Minisitiri w’Intebe wa RDC hagati ya 2012 na 2017, ku butegetsi bwa Joseph Kabila.
Ishyaka rye mu itangazo ryasohoye kuri uyu wa Gatandatu tariki ya 31 Gicurasi, ryavuze ko yabuze nyuma y’umunsi umwe akatiwe imyaka 10 yo gukora imirimo y’agahato.
Ni igihano uyu mugabo yahawe nyuma yo guhamywa n’Urukiko Rushinzwe kurinda Itegeko Nshinga kuba yaranyereje $ miliyoni 245 ari mu yari yaragenewe umushinga wo kubaka icyanya cy’inganda zitunganya ibikomoka ku buhinzi mu gace ka Bukanga-Lonzo.
Ishyaka rya Matata Ponyo riravuga ko yaburiwe irengero, mu gihe hari andi makuru avuga ko yaba yarahungiye mu Bubiligi nyuma yo gushobora gutoroka RDC aciye i Brazzaville.
