Umutwe wa M23 kuri uyu wa Kane waramukiye mu mirwano n’imitwe y’inyeshyamba ziswe ‘Wazalendo’ zishyigikiwe na Guverinoma ya Congo Kinshasa.
Amakuru avuga ko iyi mirwano iri kubera mu bice bya Kibarizo-Kahira ndetse n’ahitwa Butare.
M23 imaze amezi atatu itarwana n’Ingabo za Leta ya Congo (FARDC), gusa muri ayo mezi yose yakunze guhurira mu mirwano n’imitwe yitwaje intwaro ya Wazalendo ishyigikiwe na Guverinoma ya Congo Kinshasa.
Kugeza ubu ntiharamenyekana ibyo impande zombi zaba zatakarije mu mirwano yo kuri uyu wa Kane, gusa hari amakuru avuga ko M23 yaba yigaruriye umudugudu wa Lufulandi wo muri Groupement ya Butare.
Ni umudugudu uherereye ku bilometero icyenda uvuye mu gace ka Kahira.
Wazalendo baramukiye mu mirwano na M23, mu gihe baherukaga kwandikira Guverinoma ya Congo bayisaba kubemerera bagatsinsura uriya mutwe umaze umwaka ugenzura ibice bitandukanye, birimo Umujyi wa Bunagana.
Kuri uyu wa Gatatu impande zombi na bwo zari zaramukiye mu mirwano.
