Ikipe ya Arsenal yambuye by’agateganyo ikipe ya Manchester City umwanya wa mbere muri shampiyona y’Abongereza, nyuma yo kunyagira Aston Villa ibitego 4-2.
Wari umukino w’umunsi wa 24 wa shampiyona iyi kipe y’i Londres yari yasuyemo Aston Villa i Villa Park.
Arsenal nk’ikipe yashakaga igikombe cya Shampiyona yari yabanjemo Jorginho mu mwanya wa Thomas Partey umaze iminsi yaravunitse.
Byasabye umunota wa gatanu w’umukino ngo Aston Villa ifungure amazamu ibifashijwemo na Ollie Watkins, ku mupira yari ahinduriwe na Martin Cash.
Arsenal nyuma yo gutsindwa igitego yakangutse maze ku munota wa 16 Bukayo Saka arishyura ku ishoti rikomeye yatereye mu rubuga rw’amahina.
Aston Villa yongeye guhagurutsa abari kuri Villa Park ku munota wa 31 ubwo Philippe Coutinho yatsindaga igitego ku mupira waruhinduwe na Alex Moreno.
Igice cya mbere cyarangijwe n’imvururu zaabaye hagati ya Douglas Luiz na Bukayo Saka byatumye bose bahabwa amakarita y’umuhondo.
Igice cya kabiri cyatangiye Arsenal ishaka uburyo yatsinda igitego cya kabiri cyatuma yishyura maze ku munota wa 60 Oleksandry Zinchenko atsinda igitego ku mupira yari ahawe na Martin Ødeggard ateye koruneri.
Arsenal yakomezaga kwataka ishaka uburyo yatsinda igitego cya gatatu ngo yongere iyobore urutonde, maze Jorginho ku munota wa 93 yohereza ishoti ishoti inyuma y’urubuga rw’amahina hanyuma umuzamu Emiliano Martinez wari wahindukiye, akishyiriramo n’umutwe.
Mu minota 6 ya nyuma umusifuzi yongeyeho, ku wa 98 Aston Villa yabonye Koruneri maze umuzamu Emiliano Martinez arazamuka ngo yikosore ashyireho umutwe, gusa Lucas Digne akiwuzamura ba myugariro ba Arsenal bahise bawukuraho maze Fabio Vieira aha Gabriel Martinelli umupira asiga ba myugariro ba Aston Villa maze atsinda igitego cya kane.
Gutsinda uyu mukino byatumye Arsenal yisubiza umwanya wa mbere n’amanota 54, nyuma y’uko Manchester City bahanganye iguye miswi na Nottingham Forest igitego 1-1.
Iyi kipe y’umutoza Pep Guardiola yafunguye amazamu ku munota wa 41 w’umukino ibifashijwemo na Bernardo Silva, mbere y’uko Chris Wood yishyurira Nottingham Forest ku munota wa 84 w’umukino.
