Ikipe ya Manchester City yaciwe amande agera kuri miliyoni imwe z’amapawundi nyuma yo kwemera ko yarenze ku mategeko ya Premier League inshuro icyenda mu mwaka w’imikino wa 2024/2025.
Aya makosa yerekeye gutinda gutangira imikino cyangwa gutangira igice cya kabiri cy’umukino, binyuranyije n’ingingo ya L.33 y’amategeko agenga shampiyona.
Premier League yatangaje ko aya makosa yabaye mu mikino icyenda, harimo n’uwabereye ku kibuga cya Etihad ubwo City yatsindwaga na Manchester United ibitego 2-1 mu Ukuboza 2024.
City yaciwe amande agera kuri £40,000 ku ikosa rya mbere, ariko aya yagiye yiyongera kugeza ku £190,000 ku ikosa rya cyenda.
Ikipe yamenyesheje Premier League ko yamaze gusaba imbabazi, ndetse yongeye kwibutsa abakinnyi n’abatoza gukurikiza amategeko.
Si ubwa mbere Manchester City igaragaraho ubu butinde, kuko no mu mwaka ushize wa 2023/2024, yaciwe amande ya miliyoni £2.09 kubera amakosa nk’aya yabaye inshuro 22.
Ibi bibaye mu gihe City ikiri no mu manza zikomeye aho iregwa amakosa 130 arebana no kunyuranya n’amabwiriza y’imikoreshereze y’amafaranga (Financial Fair Play) mu gihe cy’imyaka icyenda hagati ya 2009 na 2018. Niba biyihamye, Manchester City ishobora guhanishwa ibihano bikomeye birimo no kumanurwa mu cyiciro cya kabiri.
