Umutoza wa Manchester United, Ruben Amorim yatangaje ko ikipe ye iri mu bihe bikomeye byo kurwanira kuguma muri Premier League nyuma yo gutsindwa na Newcastle ibitego 2-0 ku wa Mbere aho uku gutsindwa kwatumye isoza umwaka wa 2024 iri ku mwanya wa 14 ku rutonde rwa shampiyona.
Nubwo United ifite amanota arindwi imbere y’amakipe ari mu murongo w’abamanuka mu kiciro cya kabiri, iyi kipe igenda isubira inyuma cyane kuva Amorim yatangira kuyitoza mu kwezi gushize.
Mu mukino wo ku wa Mbere Newcastle yatsinze ibitego bibiri byihuse mu minota 19 ya mbere aho byatsinzwe na Alexander Isak na Joelinton bituma United itsindwa umukino wa gatatu wikurikiranya mu rugo muri shampiyona. Ni ibintu bitari byarabayeho kuva mu 1979.
Nyuma y’umukino Amorim yagize ati: “Ibyo birasobanutse neza rero tugomba kurwana. Iki ni kimwe mu bihe bikomeye mu mateka ya Manchester United kandi tugomba kubyakira. Tugomba guhangana n’umukino ukurikiraho.”
Manchester United ifite imikino ikomeye iri imbere harimo gusura Liverpool iyoboye urutonde rwa Premier League ku cyumweru no guhura na Arsenal mu ijonjora rya gatatu ry’igikombe cya FA Cup.
Amorim amaze iminsi anengwa bikomeye kubera uburyo yanze guhindura uburyo bwe bwo gukinisha 3-4-3 kuva yagera muri United avuye muri Sporting Lisbon aho yatsindiye ibikombe bibiri bya shampiyona.
