Mapigano makali yalizuka asubuhi ya Ijumaa katika eneo la Lugezi, ndani ya Basimukuma-Sud Groupement, wilaya ya Fizi, mkoa wa Kivu Kusini, kati ya wapiganaji wa Wazalendo na Twirwaneho, na kusababisha wakazi wengi kukimbia makazi yao.
Mapigano yalianza karibu saa 5:00 asubuhi, na kuna taarifa za vifo, lakini idadi kamili ya waliouawa au waliokimbia haijathibitishwa rasmi.
Waandishi wa habari wa eneo hilo wamethibitisha kuwa mapigano hayo ya Rugezi yanahusisha Wazalendo wa kundi la Biloze Bishambuke wanaopambana na wapiganaji wa Twirwaneho, ambao kwa sasa wamejiunga na M23. Kundi la Wazalendo linajulikana kushirikiana na jeshi la kitaifa la FARDC.
Mapigano haya yanakuja baada ya M23 kuteka eneo la Katogota siku ya Alhamisi, kilomita 80 kaskazini mwa mji wa Uvira.
Hadi sasa, kundi la M23 halijathibitisha wala kukanusha kuwepo kwake Katogota, lakini video zilizowekwa kwenye mitandao ya kijamii siku ya Alhamisi zinaonyesha watu waliodai kuwa wapiganaji wa M23 wakiwa ndani ya eneo hilo.
Mapigano haya katika Kivu Kusini wiki hii, pamoja na yale ya mwisho wa wiki iliyopita katika Kivu Kaskazini, yanatokea wakati kuna mazungumzo ya amani kati ya M23 na serikali ya Kinshasa yanayoendelea Doha, pamoja na juhudi nyingine za kupatanisha Kinshasa na Kigali huko Washington.
Juhudi hizo zinazoongozwa na Qatar na Marekani zimesifiwa na pande zote na zimeleta utulivu tangu mwezi uliopita.
Hata hivyo, mapigano ya hapa na pale yanaendelea katika mikoa yote miwili ya Kivu hadi sasa.
