Hali ya usalama inaendelea kuzorota katika mji wa Nyanzale, wilayani Rutshuru, Kivu Kaskazini, ambako mapigano mapya yalizuka tena Jumapili, tarehe 22 Juni, baada ya mchana kati ya wapiganaji wa Wazalendo na waasi wa AFC-M23. Ghasia hizi zilisitisha kwa ghafla utulivu uliokuwepo asubuhi hiyo.
Milio mikubwa ya risasi ilisikika kote mjini, na kuwatia hofu wananchi. Kwa mujibu wa taarifa kutoka eneo hilo zilizoripotiwa na Radio Okapi, raia waliokuwa wamerejea makwao mjini Nyanzale baada ya kuwa wamekimbia, walijifungia majumbani kwa hofu ya kwamba mapigano yangekuwa makali zaidi.
Mashuhuda walieleza kuwa mapigano yalitokea karibu na maeneo yanayodhibitiwa na wapiganaji wa Wazalendo (VDP), huku waasi wa M23 wakiendelea kujaribu kuchukua kijiji cha jirani cha Kiyeye, katika eneo la Kihondo.
Asubuhi hiyo, wapiganaji wa Wazalendo kutoka kikundi cha CMC walitoa tamko kulaani shambulio la bomu walilodai lililenga miji mingi, ikiwemo Nyarubande, Burambo, Muhanga, kituo cha Kihondo, na Kiyeye siku ya Jumamosi.
Walisema wanakusudia kulipiza kisasi haraka kwa kile walichokitaja kama uchokozi. Wakati huohuo, mapigano mengine yameripotiwa kutokea karibu na Katsiru kati ya waasi wa M23 na wapiganaji wa Wazalendo.
