Serikali ya Marekani imewaonya raia wake kuepuka kusafiri katika maeneo ya Rwanda yanayopakana na Jamhuri ya Kidemokrasia ya Kongo (DRC), ikieleza kuwa kuna hatari ya kuzuka kwa mapigano karibu na maeneo hayo.
Katika tangazo la ushauri wa usafiri (Travel Advisory) lililotolewa tarehe 16 Julai, Marekani imeweka wilaya za Rubavu na Rusizi kwenye Kiwango cha Nne, ambacho ndicho cha juu kabisa katika mfumo wake wa tahadhari za usafiri.
Kiwango hiki kinawakilisha onyo kubwa zaidi kwa raia wa Marekani kuhusu usalama wao nje ya nchi.
Marekani imesema kuwa kwa sababu Rubavu na Rusizi ziko karibu sana (kilomita chache) kutoka DRC, migogoro yoyote itakayoibuka DRC inaweza kuwa na athari ya moja kwa moja kwa maeneo haya. Aidha, imetaja kuwepo kwa makundi yenye silaha katika majimbo ya Kivu Kaskazini na Kivu Kusini.
Pia, Marekani imewaonya raia wake kuepuka maeneo yaliyo karibu na mpaka wa Burundi.
Watumishi wa serikali ya Marekani walioko Rwanda wanatakiwa kupata kibali maalum kabla ya kusafiri kwenda Rubavu au Rusizi.
Kwa wale wanaotaka kutembelea Hifadhi ya Taifa ya Volcanoes, wametakiwa kuwa na kibali kutoka kwa Bodi ya Maendeleo ya Rwanda (RDB).
Marekani siyo pekee iliyotoa onyo kama hilo – Uingereza ilitoa tahadhari sawa mwezi uliopita, na mapema mwezi huu, Canada pia iliwaonya raia wake kuepuka kusafiri maeneo hayo.
