Beki wa miaka 22 wa Real Madrid, Raul Asencio, bado anachunguzwa na mahakama ya Uhispania kwa tuhuma za kusambaza video ya ngono inayomhusisha msichana mwenye umri wa miaka 16.
Mahakama ya Gran Canaria imekataa ombi lake la kusitisha uchunguzi huo, ikisema kuna ushahidi wa kutosha unaoweza kuthibitisha makosa dhidi yake.
Katika taarifa aliyoitoa Alhamisi, Asencio alikana kuhusika na upigaji au usambazaji wa video hiyo, akisisitiza kuwa hajawahi kukiuka haki za kingono za mtu yeyote, hasa watoto.
Aliongeza kuwa ana imani na mfumo wa haki, na ataendelea kujitetea kwa mujibu wa sheria.
Kesi hii inaendelea, huku Asencio akichunguzwa pamoja na wachezaji wengine watatu wa zamani wa Real Madrid, wanaotuhumiwa pia kupiga na kusambaza video hiyo kinyume cha sheria.
