Muri iki igihe ku isi, ibihugu bya rutura mu bwirinzi, bikomeje isiganwa mu bijyanye n’intwaro zigezweho mu guhagarika ibisasu bishobora kurimbura umujyi nkibyo turi kubona mu ntambara ya Irani na Isiraheri.
Uyu munsi, turibanda ku itandukaniro riri hagati ya Iron Dome ya Israel ndetse na S400 y’Uburusiya. Iron Dome na S-400 byombi ni sisitemu zo kurinda ikirere, ariko zikora ku ntego zitandukanye kandi zigenewe guhangana n’ibisasu by’umwanzi byahungabanya ikirere.
Iron Dome ni sisitemu ihagarika ibisasu biturutse mu ntera ngufi byo mubwoko bwa roketi, ibisasu bya rutura,nka mortier, mu gihe S-400 yo ihagarika ibisasu biturutse mu ntera ndende cyane.
Ibi bikubiyemo, indege z’intambara kabuhariwe, ibisasu byo mu bwoko bwa misile zo mu ntera ndende, na misile za ballistique.
Umwihariko w’ubwirinzi bwa Iron Dome bukorwa n’uruganda rwa Rafael.
Iron Dome ni ubwirinzi bwakozwe na Rafael Advanced Defence Systems. Ikigo cyo muri Isiraheli. Sisitemu yagenewe gukumira no gusenya ibisasu bya roketi biturutse mu ntera ngufi hamwe n’ibisasu bya rutura byarashwe biturutse ku birometero 4 kugeza kuri 70.
Kuva mu 2011 kugeza 2021, Leta zunze ubumwe z’Amerika zatanze miliyari 1.6 z’amadolari y’Amerika muri gahunda yo kunoza ikoranabuhanga rya Iron Dome, hamwe na miliyari imwe y’amadolari y’Amerika yemejwe na Kongere y’Amerika mu 2022.
Kwimukana iyi sisiteme,biroroha mu rwego rwo kuyimura uyijyana ugamije kurinda ahantu runaka.
Ni ubwirinzi bukoresha ibisasu byagenewe gukumira kandi bidahenze cyane ugereranyije n’akazi bikora mu kurwanya ibitero byo mukirere rusange.
Ubu bwirinzi bwizewe ku kigero cya 90%.
Iron Dome ubwirinzi bukora neza ariko butizewe 100%, Dr Marion Messmer, umushakashatsi mukuru mu by’umutekano mu nzu ya Chatham, avuga ko ubu bwirinzi budashobora kuba ingirakamaro 100% nk’uko benshi babyizera. Yatangarije The Independent ati: “Igihe kinini, Iron Dome yagiye ikorerwa ubuvugizi bwiza kuruta uko iri .”
Ati: “Ni uburyo bwiza bwo kwirinda ikirere. Ariko nta buryo bwo kurinda ikirere butageragezwa rwose.”
Ni mu gihe ntambara ya Iran na Israel, nubwo Iron Dome, yagerageje guhangana n’ibisasu bya Iran, ariko yahuye n’igeragezwa ku bisasu byinshi bifite umuvuduko uri hejuru ndetse bifite moteri iyobya radari zibikurikirana.
Umwihariko wa S-400
S-400 ni Sisitemu yatunganijwe mu myaka ya za 90 n’uruganda NPO Almaz rwo mu Burusiya mu rwego rwo kuzamura umuryango wa S-300 za misile.S-400 yemerewe gukora ku ya 28 Mata 2007 kandi batayo ya mbere ya sisitemu yatangiye imirimo yo kurwana ku ya 6 Kanama 2007. Sisitemu yunganirwa na S-500.
S-400 ni uburyo bwo guhangana n’ibitero by’ikirere biturutse mu ntera ndende, kuburyo Radari yabwo ishobora kubona ibisasu bikiri mu ntera ya kilometero 400, harimo indege ndetse,na misile ballistique.
Ubu bwirinzi, buri muri sisiteme ibasha gutandukanya amako atandukanye y’ibisasu byo mu bwoko bwa misile.
Bushobora gukoresha intego zitandukanye hamwe na misile zitandukanye.Yashyizweho kugirango ihuze nizindi sisitemu mu rwego rwo gutanga urusobe rwuzuye rwo kurinda ikirere.Ibisasu bikumira ibindi bya S400, birahenda cyane kubera ikoranabuhanga rihanitse byifashisha.
Urubuga defencexp.com, muri rusange rutangaza ko Iron Dome ari uburyo bwihariye, buhendutse bwo kwirinda ibitero bya bugufi byo mu kirere , mu gihe S-400 ari uburyo bukomeye, bwagenewe guhangana n’ibitero biturutse mu ntera ndende ntse biri ku muvuduko uhanitse, bwinjizwa mu muyoboro munini wo kwirwanaho. S-400 nayo nubwo ari uburyo bwiza bwo guhangana na misile zihanitse ariko nayo ntiyizewe 100%.
