Inteko Rusange y’Umutwe w’Abadepite yasabye Minisiteri y’Imari kwita ku nama n’ibitekerezo byatanzwe ku mbanzirizamushinga y’ingengo y’Imari ya Leta ya 2025/26 hamwe n’ingamba z’igihe giciriritse (MTEF2025/26-2027/28), bigakorwa mu gihe cyo gutegura umushinga w’itegeko ry’ingengo y’imari ya Leta y’umwaka wa 2025/26.
Umutwe w’Abadepite kuri uyu wa Kabiri, itariki 27 Gicurasi, watangaje ko uzakomeza gukurikirana binyuze muri Komisiyo zihoraho ibikwiye kwitabwaho biri mu nshingano zazo byagaragajwe mu gutegura no gushyira mu bikorwa ingengo y’imari n’ingamba z’igihe giciriritse.
Mu bikwiye kwitabwaho byagaragajwe n’Umutwe w’Abadepite mu gutegura ingengo y’imari harimo:
Kongera ingengo y’imari yo kurengera abatishoboye bigahuzwa n’intego ya NST2 ijyanye no gukura abaturage mu bukene binyuze mu guhabwa inkunga zikomatanyije,
Kongera ingengo y’imari yagenewe ubuhinzi n’ubworozi kuko uru rwego rufite uruhare runini mu iterambere ry’ubukungu n’imibereho y’abaturage,
Kwishyura ibirarane by’inyongeramusaruro n’ibizakoreshwa mu gihembwe cy’ihinga cya 2025B no kwishyura ibirarane by’indishyi ikwiye,
Gushyigikira imishinga yo guteza imbere ubukerarugendo kuko izafasha kongera ishoramari no kuzamura ubukungu,
Kwita ku bikorwa n’imishinga bikorwa ku bufatanye n’abafatanyabikorwa batandukanye kugira ngo haboneke ingengo y’imari ijyanye n’uruhare rwa Leta, kugira ngo ishyirwe mu bikorwa.
