Jumapili tarehe 18 Mei 2025, watu wasiopungua 10 waliuawa baada ya mshambuliaji wa kujitoa mhanga kulipua bomu kati ya kundi la vijana waliokuwa wakijisajili kujiunga na jeshi katika eneo la Damanyo, jijini Mogadishu, mji mkuu wa Somalia, kwa mujibu wa mashuhuda waliolieleza shirika la habari la Reuters. Shambulio hilo limehusishwa na kundi la kigaidi la Al Shabaab.
Mashuhuda walisema vijana wa kike na wa kiume walikuwa wamesimama kwenye foleni langoni mwa kituo cha usajili wakati mshambuliaji alipojilipua akiwa amevaa mkanda wa mabomu.
Kapteni mmoja wa kijeshi aliyejitambulisha kwa jina la Suleiman alieleza tukio hilo:
“Nilikuwapo upande mwingine wa barabara. Tuk-tuk moja ilifika kwa kasi na kusimama. Mwanaume akashuka, akakimbilia foleni, kisha akajilipua. Niliona watu 10 waliokufa, wakiwemo waliotaka kujiunga na jeshi na waliokuwa wakipita. Idadi ya vifo huenda ikaongezeka,” alisema.
Viatu vingi vilitapakaa eneo la tukio pamoja na mabaki ya mshambuliaji.
Shahidi mwingine, Abdisalan Mohamed, alisema aliona “mamia ya vijana mbele ya lango wakifika kwa basi.”
