Alhamisi, Mei 29, msichana mmoja alikamatwa katika Kituo cha Mikenke kwa madai kuwa alitumwa kumuua Brigedia Jenerali Sematama Charles, kiongozi wa kundi la waasi wa Twirwaneho.
Ripoti zinasema kuwa msichana huyo alipofika Mikenke, alijaribu kuwaomba askari wamsaidie kupata nambari ya simu ya Jenerali Sematama.
Inasemekana alijaribu kutumia msaada wa mama mmoja anayesambaza bidhaa kambini kwa jeshi la Twirwaneho, akimwahidi dola 500 endapo angeweza kumpatia nambari hiyo.
Hata hivyo, mwanamke huyo alichagua kutoa taarifa kwa wanajeshi wa Twirwaneho, akisema msichana asiyejulikana alimwomba nambari ya kiongozi wao. Msichana huyo alikamatwa papo hapo.
Katika mahojiano, alikiri kuwa alilala katika kambi ya pamoja ya wanajeshi wa Burundi na FARDC, inayoongozwa na Kanali aitwaye Nyamusaraba, kulingana na habari zilizopatikana na BWIZA.
Inadaiwa kuwa FARDC na wanajeshi wa Burundi ndio waliomtuma msichana huyo kumuangamiza Jenerali Sematama.
Tukio hili linajiri huku jeshi la serikali ya DRC likiendelea kulenga Jenerali Sematama, miezi michache baada ya kumuua Jenerali Michel Rukunda almaarufu Makanika, aliyekuwa kiongozi wa Twirwaneho, kundi linalolinda Wanyamulenge (Watutsi wa Kongo).
Makanika aliuawa mnamo Februari mwaka huu katika shambulio la ndege isiyo na rubani (drone) lililofanywa na FARDC, na baada ya kifo chake, Sematama alichukua nafasi yake kama kamanda mkuu.
Baada ya kifo cha Makanika, kundi la Twirwaneho lilitangaza rasmi kuwa limejiunga na muungano wa AFC, ambao pia unajumuisha waasi wa M23.
