Beatrice Munyenyezi uherutse koherezwa na Amerika mu Rwanda kuri uyu wa 28 Mata 2021, yagejejwe imbere y’urukiko ngo aburane ifungwa n’ifungurwa ry’agateganyo, avuga ko yimwe uburenganzira bwo kuvugana n’umuryango we. Munyenyezi yinjiye mu rukiko rw’ibanze rwa Kicukiro, yambaye amapingu n’imyenda ya siporo, yari yunganiwe mu mategeko na Me Gatera Gashabana. Munyenyezi ufungiwe kuri station ya polisi ya Remera i Kigali, yavuze ko asaba kuvugana n’umuryango we kuko avuga ko kugeza ubu atarabona ubwo burenganzira. Yasomewe ibyaha bitandatu aregwa birimo jenoside, ubufatanyacyaha muri jenoside, gushishikariza gukora jenoside, gufata ku ngufu n’ibindi. Ntacyo yavuze ku byaha aregwa, ahubwo yasabye ko urubanza rwe rusubikwa kuko atarabona dossiye ikubiyemo ibyo aregwa. Ubushinjacyaha bwavuze ko ibyo ari uburenganzira bwe. Umucamanza yasubitse iri buranisha nk’uko uruhande rw’uregwa rwabisabye, avuga ko risubukurwa tariki 05/05/2021. Munyenyezi w’imyaka 51, yoherejwe na Amerika arangije igifungo cy’imyaka 10 yari yarakatiwe n’urukiko ahamijwe kubeshya ko nta ruhare yagize muri Jenoside mu Rwanda. Kurikira ibiganiro n’amavidewo binyura kuri Bwiza TV
