Klabu ya Rwanda APR FC huenda ikajikuta katika matatizo makubwa ya kisheria baada ya Singida Black Stars ya Tanzania kutangaza kuwa inaweza kuwasilisha malalamiko kwa FIFA, kuhusiana na mzozo wa mkataba wa mchezaji Memel Raouf Dao kutoka Burkina Faso.
Mchezaji huyo mwenye umri wa miaka 21, anayecheza kiungo, alisaini mkataba wa miaka mitatu na Singida Black Stars tarehe 14 Juni 2025, jambo lililothibitishwa na uongozi wa klabu hiyo pamoja na wakala wake Salome Compaoré.
Hata hivyo, baada ya siku tano tu, APR FC pia ilitangaza kuwa imemsainisha mchezaji huyo kwa mkataba wa miaka miwili.
Singida Black Stars wanadai kuwa wana mkataba halali kisheria, na wanasisitiza kuwa FIFA inapaswa kuingilia kati na kufanya uchunguzi na kutoa uamuzi wa mwisho.
Wakala wa mchezaji huyo, Salome Compaoré, alikana kuhusika na mazungumzo yoyote ya kumpeleka Dao APR FC:
“Nimeona picha zake akisaini na APR FC, lakini sina taarifa juu ya hilo. Nachojua ni kwamba alisaini na Singida Black Stars. Zaidi ya hapo sina taarifa.”
Hali hii inaonesha kuwa kuna mkanganyiko mkubwa wa kimkataba, na kuna uwezekano wa uchunguzi rasmi kuanzishwa ili kujua ni klabu gani inamiliki haki halali za mchezaji huyo.
Singida Black Stars wanaweza kuishinikiza FIFA iichukulie hatua APR FC, iwapo itabainika kuwa imevunja sheria za usajili wa wachezaji. Mchezaji mwenyewe pia anaweza kuadhibiwa ikiwa itathibitika alisaini mikataba miwili kinyume cha sheria.
APR FC ilimtangaza Dao kama mchezaji mpya atakayesaidia safu ya ushambuliaji kwa msimu ujao, na vyombo vya habari vya Rwanda vilikuwa vimeshamtambulisha kama mchezaji tegemeo kwenye mashindano ya ndani na kimataifa.
Migogoro kama hii ni ya kawaida katika soko la uhamisho wa wachezaji, na mara nyingi FIFA huhitajika kuingilia kuhakikisha sheria zinafuatwa na maslahi ya klabu pamoja na wachezaji yanalindwa.
