Ndayishimiye yandagaje abacamanza baburanishije umunyeshuri ukekwaho gukopera ibizamini

Perezida w’u Burundi, Evariste Ndayishimiye yandagaje abacamanza mu rukiko rukuru rwa Kirundo baherutse kuburanisha umunyeshuri wo mu mashuri yisumbuye, Christelle Ndayishimiye, ukekwaho gukopera ibizamini.

Uyu munyeshuri yatawe muri yombi, aburanishwa icyaha cyo “kumena amabanga y’akazi”, urukiko rukuru rumukatira igifungo cy’agateganyo, ajyanwa muri gereza ya Ngozi, ariko nyuma aza gufungurwa nyuma y’aho ikibazo cye giteje impaka ku mbuga nkoranyambaga.

Christelle mbere y’uko afungurwa, yari yandikiye urukiko rw’ubujurire, arumenyesha ko iki cyaha atigeze agikora, kandi ko n’umuyobozi ushinzwe uburezi mu ntara yasohoye raporo yemeza ko atakopeye ibizamini, yongeraho kandi ko abaye yaranakoze iri kosa, amategeko agenga ishuri yemeza ko yirukanwa, aho kugezwa mu butabera.

Perezida Ndayishimiye ubwo yatangizaga gahunda yo kuburanisha imanza z’ibirarane mu ntara ya Karusi kuri uyu wa 18 Nyakanga 2023, yatangaje ko hari abacamanza bakora akazi kabo nk’aho nta mategeko bazi, atanga urugero ku baburanishije Christelle.

Yagize ati: “Oya namwe nimumbwire! Uwo mucamanza yize amategeko, ashobora kuvuga ngo umwana yakopeye ikizamini aba amennye amabanga y’akazi? Umwarimu asigaye asambanya umwana, bakavuga ngo umwana ni we uri mu ikosa! Ibyo bibaho? Iyo umwuga wakunaniye, urawureka. Kubera iki mudashobora kwegura iyo mwakoze ibyo mudashoboye? Niba wumva udashoboye guhagararira amategeko, bireke, hari abandi babishoboye.”

Uyu Mukuru w’Igihugu yabwiye abacamanza ko mu gihe bazaca imanza nabi, azakoresha ahabwa n’Itegekonshinga, arenganure abarengana. Yabajije ati: “Mumbwire, mushobora guca urubanza mukurikije itegeko neza, Umukuru w’Igihugu akaza akavuga ati ‘Ndarwanze’? Nananirwa kugorora imanza mwagoretse?”

Bivugwa ko ikibazo cya Chritelle gifitanye isano n’amakimbirane yagiranye n’umuyobozi w’ishuri ryisumbuye yigagamo, Nemeyimana Oscar, ngo wamuhozaga ku nkeke amusaba ko baryamana.