Ubushinjacyaha ku Rwego Rwisumbuye rwa Ngoma bwaregeye Urukiko ikirego cy’umugabo wagerageje kwica mugenzi we amutemesheje umuhoro amuhora ko amusanze mu rugo rw’umugore bari bamaze icyumweru babana yaje gusaba amazi yo kunywa.
Icyaha akurikiranyweho yagikoze ku itariki ya 16 Mutarama 2025 mu mudugudu wa Kivogo, akagari ka Nyakagezi, umurenge wa Gahara, mu karere ka Kirehe nk’uko iyi nkuru dukesha Ubushinjacyaha Bukuru ivuga.
Uwakorewe icyaha avuga ko uyu mugabo uregwa yamusanze mu rugo rw’umugore utuye hafi y’isambu ye yagiye gusaba amazi yo kunywa, amutema inshuro 2 mu mutwe akoreshe umuhoro yikubita hasi arongera amukubita umuhoro mu mutwe no ku rutugu amumbwira ko agiye kumwica.
Uregwa yemera icyaha; avuga ko we n’uwo mugore bari bamaze icyumweru babana nk’umugore n’umugabo; agasobanura ko yamuhoye ko yasanze ari gusambana n’uwo mugore.
Icyaha akurikiranyweho giteganywa kandi kigahanishwa ingingo ya 21 n’iya 107 z’itegeko No 68/2018 ryo ku wa 30/08/2018 riteganya ibyaha n’ibihano muri rusange.
