Nibura abagore 140 n’abakobwa ku Isi yose babura ubuzima buri munsi bishwe n’umuntu bazi cyane; nk’abagabo babo cyangwa uwo bafitanye isano wa hafi, nk’uko raporo nshya y’Umuryango w’Abibumbye yabyerekanye.
Raporo y’ubwicanyi bukorerwa umugore yasohotse kuri uyu wa Mbere yerekana ko buri minota 10, umukobwa cyangwa umugore yicwa.
Yagaragaje kandi ko umubare w’abagore n’abakobwa bishwe n’abo bakundana cyangwa abandi bagize umuryango wiyongereye mu 2023.
Imibare yerekanaga ko mu mwaka wa 2023, abagore n’abakobwa 51.100 bishwe n’abakunzi babo cyangwa abandi bagize umuryango, ugereranije na 48.800 bishwe mu 2022.
Raporo yakozwe na UN Women na n’Ibiro by’Umuryango w’Abibumbye bishinzwe kurwanya Ibiyobyabwenge n’Ubugizi bwa nabi (UNODC) ivuga ko muri Afurika hagaragaye abagera ku 21.700 bahohotewe n’abagabo babo cyangwa abo bafitanye isano mu 2023.
Umuryango w’Abibumbye wavuze ko ku Isi hose, abagore 1.3 ku 100.000 bibarwa ko bishwe n’abakunzi/abagabo babo cyangwa undi muntu wo mu muryango mu 2023.
