Kuri uyu wa kabiri w’irariki ya 21 Nyakanga, hatangiye urubanza rwa Omar Al-Bashir wahoze ayobora igihugu cya Sudani, kuri Coup d’Etat ya gisirikare yamushyize ku butegetsi mu myaka 31 ishize ashinjwa kuyobora.
Byari byitezwe ko Al-Bashir agaragara mu rukiko rw’i Khartoum mu murwa mukuru wa Sudani saa mbili z’isaha ngengamasaha ya GMT (10h00 z’i Kigali), kugira ngo aburanishwe ku byaha ashinjwa birimo kwica itegeko Nshinga, kwica iteka rya gisirikare ndetse no kuba Inyeshyamba, nk’uko byatangajwe na Al-Moez Hadra, umwe mu banyamategeko bamugejeje imbere y’butabera.
Omar Al-Bashir w’imyaka 76 y’amavuko, araburanishwa ari kumwe na bagenzi be 16 bareganwa, barimo babiri bigeze kuba ba Visi-Perezida be, abahoze ari Abaminisitiri ku ngoma ye ndetse n’Abaguverineri.
Mu gihe Bashir kuri ubu ufungiye ibyaha bya ruswa yahamwa n’iriya Coup d’Etat, yahabwa igihano cy’urupfu.
Omar Al-Bashir yabaye Perezida wa Repubulika ya Sudani mu 1989, nyuma ya Coup d’Etat ya gisirikare yakoreye Minisitiri w’Intebe, Sadek al-Mahdi wari watowe binyuze mu nzira ya Demokarasi.
Bashir yahiritswe ku butegetsi muri Mata umwaka ushize, nyuma y’imyigaragambyo ikomeye yakozwe n’ibihumbi by’abaturage ba Sudani bamusabaga kwegura.
Mu mpera za 2019 Bashir yahamijwe ibyaha bya ruswa, gusa ntiyigeze aburanishwa ku byaha byibasiye inyoko muntu byakozwe mu gihe cy’imyaka 30 y’ubutegetsi bwe.
Magingo aya nyuma y’uko Omar Al-Bashir ahiritswe ku butegetsi, Repubulika ya Sudani iyobowe na Guverinoma y’inzibacyuho igizwe n’abasirikare n’abasivili, mu gihe hagitegerejwe igihe amatora y’umukuru w’igihugu azabera.
