Umufaransa Ousmane Dembele ukinira Paris Saint-Germain y’iwabo, ni we waraye wegukanye igihembo cya Ballon d’Or gihabwa umukinnyi wahize abandi ku Isi.
Dembélé yegukanye iki gihembo ahigitse abarimo umunya-Espagne Lamine Yamal n’umunya-Portugal Vitinha bari bagihataniye.
Uyu mukinnyi ufite inkomoko muri Mali mu mwaka w’imikino ushize yakinnye imikino 53, atsinda ibitego 35 anatanga imipira 14 yavuyemo ibitego.
Dembélé by’umwihariko yagize uruhare mu bikombe bitanu PSG yatwaye, birimo icya UEFA Champions League, icya shampiyona y’u Bufaransa, Coupe de France ndetse na Super Coupe ya UEFA.
Ku ruhande rw’abagore, Aitana Bonmati ukinira Barcelona ni we watwaye Ballon d’Or nyuma yo guhigika Mariona Caldentey akinira Arsenal.
Lamine Yamal uri mu bahabwaga amahirwe yo gutwara Balloon d’Or we yahawe igihembo cya Kopa Trophy gihabwa umukinnyi muto wahize abandi; aba umukinnyi wa mbere uhawe iki gihembo inshuro ebyiri zikurikiranya.
Uyu musore w’imyaka 18 y’amavuko mu mwaka ushize w’imikino yakinnye imikino 55, atsinda ibitego 28 anatanga imipira 21 yavuyemo ibitego.
Yamal by’umwihariko yafashije Barça gutwara ibikombe bitatu bikinirwa imbere muri Espagne, birimo icya Shampiyona, Copa del Rey na Supercopa de Espana.
Ni mu gihe umutoza w’umwaka yabaye Luis Enrique wa PSG, na ho igihembo cy’umukinnyi watsinze ibitego byinshi gihabwa Viktor Gyökeres wa Arsenal.
