Byibuze abantu 50 bishwe abandi barenga 50 barakomereka mu iturika ry’igisasu mu gihugu cya Pakistan nk’uko igipolisi cyabitangarije BBC.
Kuri uyu wa Gatanu, igisasu cyaturikiye hafi y’umusigiti wo mu majyepfo y’iburengerazuba bw’intara ya Balochistan ubwo abantu bateraniraga kwizihiza ivuka ry’Intumwa Muhamadi.
Polisi ikeka ko ari igitero cy’ubwiyahuzi cyibasiye igiterane cy’idini mu mujyi wa Mastung.
Abayobozi bahise batangaza ibihe bidasanzwe.
Abapfuye n’abakomeretse bajyanwe ku bitaro bibiri byo muri uyu mujyi nk’uko igipolisi gikomeza kibitangaza.
Abayobozi babiri mu gipolisi cyo mu Mujyi wa Mastung bemeje umubare w’abapfuye ubwo bavuganaga na BBC.
Minisitiri w’umutekano, Sarfraz Bugti we yise iki gitero, kitarigambwa n’umuntu wese, “igikorwa cy’urwango rukabije.”
