Ibi ni ibyatangajwe na Dr Jean Minani, perezida w’ishyaka Sahwanya Frodebu Nyakuri mu kiganiro yagiranye n’imwe muri radiyo z’i Burundi aho yagarutse ku bwicanyi bukomeje gukorerwa abarundi ahamya ko bukorwa na Perezida Nkurunziza n’abambari be.
Dr Jean Minani yagarutse cyane ku rugendo rw’intumwa za Loni 15 zari zaje mu Burundi mu cyumweru gishize, ko zakiranwe agasuzuguro kadasanzwe ngo byose bikozwe na Perezida Nkurunziza wakagombye kubera abandi ikitegererezo.
Ati:” ubwo bashyikaga ku kibuga cy’indege, bari bashyizeho insoresore z’Imbonerakure nyinshi zaje zije kwamagana ishyirahamwe mpuzamahanga ONU, nari ntarabona igihugu cyamagana ishyirahamwe ONU, igihugu cy’u Burundi kwagirango ni igihugu kiri hejuru, kitari mu bindi bihugu, kitari kuri iyi si, aho baciye hose bakirijwe ibitutsi, twarabyiboneye,…”.
Ako gasuzuguro kandi ngo kanagaragaye kuri Perezida Nkurunziza ubwo yabwiraga izi ntumwa za Loni ngo nizimusange ku Gitego ari yari ari ho kubonanira nazo mu mujyi i Bujumbura.
Ati: “sinavuga ko ari ubwirasi bwa Nkurunziza kuko ntacyo akiratiye, aho ava i Bujumbura ngo nibamusange ku Gitega kandi yari ari iBujumbura, bigaragaza rero agasusuguro no kutamenya umushyitsi waje kukureba,…”.
Akomeza avuga ko Leta y’u Burundi ikora ibyaha ndengakamere na Loni itajya ibabarira birimo gufata abagore ku ngufu bakabanduza indwara zidakira ndetse bakanabica.
Ati: “Ese ko mbona mu Burundi SIDA ari nyinshi, ubwo iyo ugiye kurongora umuntu ku ngufu urwaye SIDA uba utamwishe, iyo ugiye kumurongora urwaye hepatite C ntuba umwishe, mbega uba umwishe kuko ntaba akiri umuntu nk’abandi kuko ahita arwara mu mutwe kubera ibyo, ni ubwicanyi nk’ubundi amakungu akwiye guhagurukira akadufasha,…”.
Ku bwa Dr Jean Minani, ahamya ko Perezida Nkurunziza adasenga Imana nyayo abandi basenga ahubwo ko yaritswemo n’amashitani akomeje no kumukoresha ikibi.
Ati: “iri bara ntiryari ryarabayeho, kuva kera narindiho ibyo ntibyakozwe, iryo bara ry’ubwicanyi Nkurunziza n’abiwe batuzaniye…,ubu ni amashitani yabajemo, numva ngo arasenga ariko twe twibaza ko adasenga Imana asenga amashitani kuko niyo yashobora kumwoshya ayo mabi yose akorera abanyagihugu”.
Dr Jean Minani atunga agatoki Leta ya Nkurunziza ko yica abaturage mu gihe Ishyirahamwe mpuzamakungu riharanira uburenganzira bwa muntu, Amnesty International riravuga ko ryabonye amafoto y’ibyogajuru (Satellite), yerekana ko abantu benshi mu Burundi bishwe hanyuma bahambwa hamwe mu byobo rusange, amafoto akaba yarashyizwe hanze kuri uyu wa Gatanu tariki ya 29 Mutarama.
Kanda hano ujye ubona amakuru yihuse kandi kugihe kuri Facebook no kuri twitter
Nsengiyumva Philipe/Bwiza.com
