Perezida wa Ukraine, Volodymyr Zelensky yaciwe amande y’1250 y’Amadolari y’Amerika azira kurenga ku mabwiriza yo gukumira icyorezo cya Covid-19 arimo kwambara agapfukamunwa.
Ni nyuma y’aho tariki ya 3 Kamena 2020, uyu Mukuru w’Igihugu yafotowe ari kumwe n’abandi bayobozi aho banywera ikawa mu mujyi wa Khmelnytskyi, ifoto igashyirwa ku rubuga rw’Ibiro bye kandi bose nta dupfukamunwa bambaye nk’uko Qatar Tribune yabitangaje. Mbere y’icyo gihe, aba bayobozi bari bahoze bakora urugendo muri uyu mujyi.
Perezida Zelensky yabwiye itangazamakuru ko amande yaciwe ayishyura kandi abayamuciye bari bafite ishingiro.
Si ubwa mbere uyu Mukuru w’Igihugu aciwe amande azira kwica amabwiriza rusange kuko no muri Gicurasi 2019 ubwo habaga amatora y’Umukuru w’Igihugu, Volodymyr Zelensky yahishuye uwo yatoye kandi bitemewe, ategekwa gutanga amadolari y’Amerika 32.6.
