Polisi ya Uganda yahakanye amakuru yatangajwe n’abayoboke b’umukandida Robert Kyagulanyi (Bobi Wine) yavugaga ko yamutaye muri yombi, ivuga ko icyabaye ari ukumusubiza mu rugo i Kampala.
Itangazo rya Polisi ya Uganda rirasava abarisoma kudaha agaciro abatangaje ko uyu mukandida yafunzwe. Riti: “Ntimuhe agaciro ibyatangajwe na NUP (National Unity Platform) n’abakoresha imbuga nkoranyambaga ko Hon. Kyagulanyi Ssentamu yatawe muri yombi, ari kwiyamamariza mu Karere ka Kalangala.”
Polisi yavuze ko Bobi Wine yari akomeje guhuriza hamwe abantu benshi kandi bitemewe muri ibi bihe bya Covid-19, hashingiwe ku mabwiriza ya Komisiyo y’Igihugu y’Amatora na Minisiteri y’Ubuzima. Iti: “Turi kumusubiza mu rugo iwe muri Magere, Kampala.”
Amakuru yatangajwe n’abayoboke ba Bobi Wine n’ibitangazamakuru byigenga muri Uganda, yavugaga ko Bobi Wine yafunganwe n’itsinda ry’abamufasha kwiyamamaza nyuma yo kugotwa n’abashinzwe umutekano barimo abapolisi, abasirikare n’umutwe wihariye ushinzwe kurwanya ibikorwa by’iterabwoba.
