Polisi wa Rwanda walioko katika kikosi cha RWAFPU3 chini ya ujumbe wa Umoja wa Mataifa wa kulinda amani katika Jamhuri ya Afrika ya Kati (MINUSCA), wakihudumu katika jiji la Bangassou, mkoa wa Mbomou (kusini-mashariki mwa nchi), walishiriki katika zoezi la usafi wa pamoja na wakazi wa eneo hilo.
Zoezi hilo lilifanyika katika kata ya 1er Arrondissement, mojawapo ya wilaya za jiji la Bangassou, likihusisha ushirikiano kati ya polisi wa Rwanda, wafanyakazi wa Umoja wa Mataifa kutoka mataifa mbalimbali, raia wa eneo hilo, na vikosi vya usalama vya taifa. Usafi huo ulijumuisha kusafisha makaburi ya Bangassou, kukata vichaka na miti ya kuzunguka, na kupalilia nyasi kandokando ya barabara ya Bangassou kuelekea Bangui.
Théophile Demba, Meya wa jiji la Bangassou, aliwashukuru polisi wa Rwanda kwa kazi yao ya kipekee ya kuwalinda raia, kushirikiana na vyombo vya usalama vya ndani kuhakikisha usalama, na kwa kushiriki katika shughuli za maendeleo ya jamii.
Kamishna Mwandamizi wa Polisi (SSP) Thomas Kayonga, kiongozi wa kikosi cha RWAFPU3-3, aliwashukuru wananchi kwa kushiriki kwa hiari katika zoezi hilo na kwa bidii yao katika kulinda afya ya jamii.
Alisema:
“Kuendeleza usafi mahali tunapoishi na tunapofanyia kazi ni jukumu la kila mmoja wetu kwa kuwa usafi ni chanzo cha afya. Nawashukuru wote walioshiriki nasi katika zoezi hili la huduma kwa jamii, kwani linaimarisha mshikamano, ambao ndio msingi wa amani na maendeleo.”
Aliwakumbusha kuwa umuganda ni njia nzuri ya kufanya kazi kwa pamoja na kutatua changamoto za pamoja, jambo linalosaidia kuharakisha maendeleo ya eneo na taifa kwa ujumla. Aliwahimiza kuendeleza utamaduni huo na kuwahamasisha wengine kujiunga ili kuishi katika mazingira bora.
Rwanda ilianza kupeleka maafisa wa polisi katika operesheni za kulinda amani nchini Jamhuri ya Afrika ya Kati mwaka 2014. Kwa sasa ina vikosi vinne vyenye zaidi ya maafisa 640 wanaohudumu katika maeneo mbalimbali ya nchi hiyo.
