Rais wa Burundi, Evariste Ndayishimiye, ametangaza kuwa ana mpango wa kushambulia Rwanda na kufika Kigali endapo Bujumbura itashambuliwa.
Ndayishimiye alisema haya katika mahojiano ya hivi karibuni na BBC Gahuzamiryango.
Chombo hicho cha habari kilimnukuu akisema kuwa Rwanda inapanga kushambulia Burundi kwa kutumia kundi la waasi la RED-Tabara. Alisema kuwa endapo kundi hilo litashambulia Bujumbura, naye atajibu kwa kushambulia Kigali.
Alisema: “Tunajua kuwa Rwanda inajaribu kutushambulia kupitia ardhi ya Jamhuri ya Kidemokrasia ya Kongo, kwa kutumia kundi la Red-Tabara. Lakini tunawaonya kuwa wakijaribu kushambulia Bujumbura kupitia Kongo, basi sisi pia tutafika Kigali kwa urahisi kupitia Kirundo.”
Rais Ndayishimiye alidai kuwa ana habari za kuaminika zinazoonyesha kuwa Rwanda inapanga kushambulia Burundi. Alionya kuwa ikiwa vita hiyo itatokea, inaweza kusababisha mgogoro mkubwa katika eneo zima.
Alisema: “Nchi ya Rwanda haijawahi kuhisi amani bila kusababisha mivutano. Tayari imegombana na Uganda na Tanzania… Sasa inashiriki vita huko Kongo huku pia ikipanga kutushambulia.”
Akaongeza: “Hatutaruhusu kuuawa kama wanyama, kama wanavyofanya kwa Wakongo. Tutapigana, na Warundi wako tayari.”
Kauli za Ndayishimiye zinakuja wakati wa mvutano mkubwa wa maneno dhidi ya Rwanda.
Mzozo huu wa maneno ulianza Januari mwaka huu wakati alipozungumza na wanadiplomasia wanaowakilisha mataifa mbalimbali nchini Burundi.
Wakati huo, alidai kuwa Rwanda inapanga kuvamia nchi yake na akaonya jumuiya ya kimataifa kwamba ikiwa haitachukua hatua dhidi ya Rwanda, vita hiyo itakuwa ya kikanda.
Mnamo Februari, alipokuwa akiwatembelea wananchi wa mkoa wa Kirundo, alisisitiza kuwa anajiandaa kwa vita na Rwanda na akawataka wananchi wake kuwa tayari kupigana.
Aliwaambia wakaazi wa Komine Bugabira: “Jiandaeni, msiogope, tunawajua vizuri. Ninyi huko Bugesera mnawajua, tangu enzi za ufalme hawajawahi kutushinda. Je, wanaweza kutushinda sasa? Wakumbusheni historia yao ilipoanzia Kirundo.”
Hivi karibuni, akiwa katika ibada ya kanisa la Eglise Vision de Jésus-Christ, Rais Ndayishimiye alidai kuwa Rwanda inapanga kushambulia nchi yake. Alisema kuwa ingawa Rwanda ina jeshi lenye nguvu, jeshi lake lina nguvu zaidi.
Alisema: “Haya maneno yao kwamba wataishambulia Burundi si kitu cha kunishangaza. Nilisikia wakisema kuwa jeshi la Rwanda lina nguvu, lakini kama wangekuwa wanajua aina ya jeshi nililonalo! Wanawezaje kulifahamu jeshi langu bila kumshirikisha Mungu ili awaonyeshe?”
Rais wa Burundi pia alitoa onyo kwa Rwanda, akisema kuwa ikiwa itashambulia nchi yake, wanajeshi wake watashambuliwa na kundi la nyuki wenye sumu.
Alisema: “Burundi lina jeshi, linaloonekana na lisiloonekana. Burundi inalindwa, nawapa uhakika. Tuna jeshi. Kama wangekuwa wanaona ninachoona… Mungu anaweza kusema, ‘Nyuki, nendeni mkawashambulie,’ na nyuki wangewashambulia.”
Ndayishimiye alisema haya baada ya kuishutumu Rwanda kwa kuwa nyuma ya machafuko na mauaji yanayotokana na ukabila yanayoendelea Burundi na Jamhuri ya Kidemokrasia ya Kongo.
Serikali ya Rwanda, kupitia msemaji wake, ilisema kuwa madai ya Rais wa Burundi yanashangaza, hasa kwa kuwa maafisa wa kijeshi wa nchi hizo mbili wamekuwa wakikutana ili kujadili njia za kulinda mipaka yao ya pamoja.
Msemaji wa serikali alisema: “Kauli hizo ni za kushangaza kwa sababu kwa kweli, maafisa wa kijeshi na usalama wa Rwanda na Burundi walikuwa wanakutana ili kujadiliana kuhusu jinsi tunavyoweza kulinda mipaka yetu kwa pamoja, kwa kuzingatia hali inayotokea mashariki mwa Kongo.”
Licha ya kauli hizo, Rais Paul Kagame hivi karibuni alisema kuwa jitihada zinafanywa ili kurejesha uhusiano wa kidiplomasia kati ya Rwanda na Burundi, ambao umedorora kwa muda mrefu.
Kagame alitoa kauli hiyo kufuatia mikutano iliyofanyika hivi karibuni kati ya wakuu wa ujasusi wa Rwanda na Burundi, mjini Kigali na Kirundo, kwa lengo la kutatua mzozo uliopo.
