Ikipe ya Rayon Sports yatsinze bigoranye Police FC ibitego 3-2; mu mukino ubanza wa ½ cy’irangiza cy’Igikombe cy’Amahoro wabaye kuri uyu wa Gatatu.
Police FC yari yakiriye Rayon Sports mu mukino ubanza wa ¼ cy’irangiza wabereye kuri Stade Régional ya Muhanga. Ni umukino utarabereye kimwe n’indi bijyanye n’uko Rayon Sports yari imaze igihe igitegereje ko amakimbirane yayo n’Intare FC akemuka.
Ikipe y’umutoza Haringingo Francis yinjiye mu mukino yotsa igitutu Police FC, ndetse umunota wa karindwi w’umukino wari uhagije ngo ifungure amazamu ibifashijwemo na Ngendahimana Eric.
Hari ku mupira wari uturutse kuri koruneri yari itewe na Héritier Luvumbu mbere y’uko Eric awutereka mu izamu n’umutwe.
Rayon Sports yarushaga Police FC yari yagowe no kwinjira mu mukino yatsinze igitego cya kabiri ku munota wa 13 biciye k’uumunya-Uganda Musa Esenu, ku mupira yari acomekewe na mwene wabo Joackiam Ojera.
Umunya-Caméroun Essomba Willy Onana yatsindiye Rayon Sports igitego cya gatatu ku munota wa 31 w’umukino nyuma yo gucenga ba myugariro ba Police FC.
Igitego cya gatatu cya Rayon Sports gisa n’icyakanguye abakinnyi ba Police FC babonaga ko bashobora kurya byinshi, batangira kugaruka mu mukino gake gake.
Iyi kipe y’umutoza Mashami Vincent yagabanyije umwenda ibifashijwemo na Mugisha Didier, ku mupira wari ucometswe na Nsabimana Eric birangira Rwatubyaye Abdul ananiwe kuwugarura.
Igice cya kabiri cy’umukino cyaranzwe no gusatira ku ruhande rwa Police FC yakigarukanyemo intego yo gukora ibishoboka byose ikishyura Rayon Sports.
Iyi kipe yatsinze igitego cya kabiri cya penaliti ku munota wa 61 w’umukino nanone biciye kuri Mugisha Didier; nyuma yo kugushwa mu rubuga rw’amahina na myugariro Mucyo Didier Junior.
Ni igitego cyaje gikurikira uburyo bukomeye Police FC yari imaze guhusha ubwo Kayitaba Jean Bosco wari winjiye mu kibuga asimbura Ntirushwa Aimé yateraga ishoti riremereye gusa umupira ukagarurwa n’umutambiko w’izamu.
Iyi kipe ya Polisi y’u Rwanda yakomeje kotsa igitutu Rayon Sports yari yasubiye inyuma iyishakamo igitego cya gatatu, gusa uburyo yagiye ibona ntiyabubyaza umusaruro.
Nka mbere gato y’uko umusifuzi Uwikunda Samuel asoza umukino Mugisha Didier yarekuye ishoti riremereye, gusa biba ngombwa ko Rayon Sports irokorwa n’umunyezamu Hategekimana Bonheur.
Biteganyijwe ko amakipe yombi azahurira mu mukino wo kwishyura uteganyijwe ku wa 03 Gicurasi 2023.
Ikipe izasezerera indi izahurira muri ½ cy’irangiza na Mukura VS yasezereye Musanze FC kuri penaliti 4-2; nyuma yo kunganya igiteranyo cy’igitego 1-1.
Undi mukino wa ½ cy’irangiza ugomba guhuza Kiyovu Sports yasezereye Rwamagana City ku giteranyo cy’ibitego 5-3 na APR FC iheruka gusezerera Marines FC ku bitego 6-3.
