Guverineri w’Intara ya Ituri, Pacifique Keta yatangaje kuri uyu wa Kabiri tariki ya 26 Werurwe 2019, ko inzego z’umutekano zataye muri yombi abashinjwa kwica Abashinwa babiri n’umunye-Congo umwe.
Aba bashinwa n’uyu muturage wo muri Congo bishwe mu cyumweru gishize, mu gace gacukurwamo amabuye y’agaciro, muri teritwari ya Mambasa.
Ikinyamakuru Actualitecd gitangaza ko ari abantu batatu bafashwe bashinjwa ubu bwicanyi, bafatanwe intwaro ndetse n’umubare w’amafaranga n’ibindi bintu byari bifitwe n’abo Bashinwa bishwe.
Guverineri Pacifique yagize ati “Ubu twafashe abantu batatu bacyekwaho icyo cyaha, muri Teritwari ya Mambasa. Nirinze kubabwira uburyo bafashwemo kuko iperereza rirakomeje”.
Yakomeje avuga ko bafashwe ku wa Gatandatu w’icyumweru gishize, bakaba barafatanwe imbunda enye zo mu bwoko bwa AK47 n’amasasu, amadolari ya Amerika ndetse n’amayuwani y’u Bushinwa, ati “Ibyo byafashwe nk’ibimenyetso bibashinja”.
Avuga ko abafashwe bazoherezwa i Bunia kugira ngo bagezwe imbere y’ubutabera.
Mu cyumweru gishize nibwo aba bashinwa n’umunye congo biswe, bishinjwa inyeshyamba za Mai-Mai , ko habayeho kubanza gukozanyaho hagati yazo n’abashinzwe umutekano w’agace biciwemo ka Bihombo gacukurwamo amabuye y’agaciro.
RDC: Abashinwa babiri n’Umunyekongo biciwe mu gitero cy’inyeshyamba
