Ishyirahamwe rya Basketball muri Repubulika Iharanira Demokarasi ya Congo (FEBACO) ryafatiye ibihano bikomeye abakinnyi n’abatoza bagaragaye mu iserukiramuco rya Giants of Africa 2025 ryabereye i Kigali, ku mpamvu z’uko bahagarariye igihugu batabifitiye uburenganzira.
Iri serukiramuco, ryabaye kuva tariki ya 26 Nyakanga kugeza ku ya 2 Kanama 2025, ryahuje urubyiruko n’abatoza bo mu bihugu bitandukanye bya Afurika, rigamije guteza imbere impano muri Basketball binyuze mu mikino, amahugurwa n’ibindi bikorwa by’ubushobozi.
Nyuma yo gusozwa kw’iryo serukiramuco, Minisitiri wa Siporo muri RDC, Didier Budimbu Ntubuanga, yasabye FEBACO gusobanura uburyo bamwe mu baturage b’iki gihugu bitabiriye ibikorwa byaberaga mu Rwanda bambaye ibendera rya RDC kandi nta burenganzira bahawe.
Mu itangazo ryashyizwe hanze na FEBACO, ryatangajwe ko abatoza bane bagaragaye muri Giants of Africa 2025 birukanwe burundu, barimo Natacha Teba Mambengya, wabaye Kapiteni w’Ikipe y’Igihugu ya RDC mbere yo kuba umutoza wa BC Hatari.
Abakinnyi bo bahagaritswe hagati y’amezi 12 n’imyaka ibiri, aho Gloire Tambwe Mwamba ahanwe bikomeye ahabwa imyaka ibiri kuko atari ubwa mbere akoze amakosa nk’ayo, ndetse akaba yaranigeze kwanga guhamagarwa mu ikipe y’igihugu.
Aba bose bashinjwa kwambara ibendera rya RDC no guhagararira igihugu muri gahunda mpuzamahanga batabifitiye uburenganzira bwemewe n’inzego zibishinzwe.
Ibi bihano byafashwe nyuma y’uko RDC yari imwe mu bihugu byari byahagarariwe muri Giants of Africa 2025, alongside Ethiopia, Kenya, Somalia, Uganda, Tanzania, Botswana, Afurika y’Epfo, Ghana, Nigeria, Burkina Faso, Côte d’Ivoire, Bénin, Mali, Maroc na Sénégal.
One Response
Wa mugabo we, urwanko uriko ubiba nirwo ruzakwirukana ku butaka bwa Congo.Uri kwigenza nk’inyamaswa itagira ubwonko bwo gutekereza