Umugaba Mukuru w’Ingabo z’u Rwanda, Gen Mubarakh Muganga, kuri uyu wa Kabiri tariki ya 6 Kanama yayoboye umuhango usoza amasomo ya Brigade y’abasirikare bari bamaze igihe bahabwa imyitozo igenewe ingabo zirwanira ku butaka.
Ni imyitozo bari bamaze amezi atandatu bahererwa mu kigo cy’imyitozo cy’Ingabo z’u Rwanda giherereye i Gabiro mu karere ka Gatsibo.
Mu mezi atandatu iriya Brigade yari imaze i Gabiro abayigize bahawe ubumenyi mu bijyanye no kurasa, amayeri, kuyobora urugamba, imikino njyarugamba, imyitozo ngororamubiri ndetse no kumanuka muri kajugujugu bifashishije imigozi.
Abasirikare basoje amasomo berekanye ubumenyi bahawe burimo ubujyanye n’amayeri y’urugamba, kurasa ndetse n’ubujyanye n’imikino njyarugamba; mu rwego rwo kugaragaza ko biteguye guhangana n’umwanzi ndetse bakaba babifitiye ubushobozi.
