Ikipe ya Real Madrid yaburiye abakinnyi bayo ko bashobora kugerwaho n’ingaruka zikomeye, mu gihe umwaka w’imikino wa 2025-2026 warangira nta gikombe na kimwe batwaye.
Iyi kipe yatanze umuburo nyuma y’uko mu ijoro ryakeye yaraye isezerewe mu Gikombe cy’Umwami (Copa Del Rey), nyuma yo gutsindwa n’ikipe ya Albacete ihagaze nabi mu cyiciro cya kabiri ibitego 3-2.
Iri sezererwa ryaje nyuma y’iminsi itatu Madrid itwawe igikombe cya Super Coupe na mukeba wayo FC Barcelona na yo yayitsinze ibitego 3-2, ibyanatumye Real yirukana Xabi Alonso wari umutoza wayo mukuru.
Uyu Alonso yahise asimburwa by’agateganyo na Alvaro Albeola waraye atsinzwe umukino wa mbere yari atojemo Real Madrid.
Kuri ubu ikinyamakuru byegereye Madrid bivuga ko ubuyobozi bwayo bwamaze guteguza abakinnyi ko nibananirwa gutwara igikombe na kimwe ari bo bazabiryozwa.
Iki kinyamakuru cyasubiyemo ubuyobozi bwa Real Madrid bubwira abakinnyi buti: “Xabi Alonso nta wukiri hano, ni mwebwe rero tuzaveba kuri buri kimwe.”
Televiziyo ya El Chirongito yo ivuga ko abakinnyi bategujwe “ingaruka zikomeye imbere mu kipe” mu gihe barangiza umwaka w’imikino nta gikombe na kimwe batwaye.
Kuri ubu Real Madrid ihanze amaso ibikombe bibiri, birimo icya shampiyona ya Espagne (La Liga) ihanganiye na FC Barcelona iyirusha amanota ane.
Iyi kipe kandi ihanze amaso igikombe cya UEFA Champions League kugeza ubu amakipe yose akomeye ku mugabane w’u Burayi na yo agitekereza gutwara.
