Rutahizamu w’Amavubi, Gitego Arthur, yatandukanye na AFC Leopards yo muri Kenya nyuma y’ubwumvikane bw’impande zombi.
Gitego yari yageze muri iyi kipe muri Mutarama 2024, asinya amasezerano y’imyaka ibiri avuye muri Marines FC.
Mu mwaka umwe yahamaze, yatsinze ibitego bitanu muri FKF Cup, bitatu muri shampiyona ndetse atanga umupira umwe wavuyemo igitego.
Mu butumwa AFC Leopards yashyize ku mbuga nkoranyambaga zayo kuri uyu wa Kabiri, yashimiye uyu mukinnyi ku buryo yitwaye mu ikipe, imwifuriza amahirwe mu rugendo rwe rushya.
Gitego yari amaze ukwezi asaba gutandukana n’iyi kipe, avuga ko hari andi makipe yamwifuzaga, ariko AFC Leopards ikomeza kumugumana.
Yavuze kandi ko nyuma yo kugira imvune yamukuye mu kibuga amezi abiri, amakipe yamushakaga yagowe no kumubona kubera ibisabwa.
Uyu rutahizamu yavuze ko atari atekanye muri Kenya, kubera umutekano muke ndetse n’igitutu cy’abafana. Kuri ubu, biracyategerejwe aho azakomereza.
