Rtahizamu w’Umunyarwanda wigeze gukinira Marine FC, Gitego Arthur yamaze gusinya amasezerano y’imyaka itatu mu ikipe ya FUS Rabat yo mu Cyiciro cya Mbere muri Maroc.
Uyu mukinnyi w’imyaka 24 yari amaze umwaka akinira Clube Ferroviário da Beira yo muri Mozambique, aho yahavuye ajya kugerageza amahirwe muri Raja Casablanca ariko ntibyakunda.
Ubu yahise yerekeza muri FUS Rabat, imwe mu makipe akomeye mu gihugu, yabaye iya kane muri shampiyona iheruka n’amanota 53.
Abinyujije ku mbuga nkoranyambaga ze, Gitego yashimiye ikipe ya Ferroviário da Beira yamubereye umuryango, anatangaza ko yishimiye intambwe nshya yateye.
FUS Rabat ifite amateka akomeye muri ruhago ya Maroc, aho yegukanye igikombe cya shampiyona mu mwaka wa 2015/2016, ndetse na CAF Confederation Cup mu 2010.
Gitego Arthur yanyuze muri Marine FC, akomereza muri AFC Leopards yo muri Kenya, mbere yo kwerekeza muri Mozambique. Kwinjira kwe muri FUS Rabat ni indi ntambwe ikomeye mu rugendo rwe nk’umukinnyi mpuzamahanga.
