Ijumaa hii, Rwanda ilitangaza kuwa lina ushahidi wa shambulio kubwa ambalo Jamhuri ya Kidemokrasia ya Kongo ilikuwa inapanga kulifanya dhidi yake, huku likikanusha tena kuhusika katika mzozo unaoendelea nje ya mipaka yake.
Kwa mujibu wa Reuters, Kigali na Kinshasa zimekuwa zikilaumiana kwa kusababisha hali ya kutokuwa na usalama mashariki mwa Kongo, ambapo waasi wa M23 waliteka jiji la Goma, mji mkuu wa jimbo la Kivu Kaskazini, siku chache zilizopita, na sasa wanapanua mapigano yao hadi Kivu Kusini.
Balozi wa Rwanda katika Baraza la Haki za Binadamu la Umoja wa Mataifa huko Geneva, James Ngango, aliiambia mkutano wa dharura wa baraza hilo:
“Tunakataa vikali jaribio la DRC la kuonyesha kuwa Rwanda ndiyo chanzo cha hali ya kutokuwa na usalama mashariki mwa DRC.”
Aliongeza:
“Kinachoonekana wazi sasa ni kuwa hali ya sasa ni tishio kubwa kwa usalama wa Rwanda. Baada ya kutekwa kwa Goma, tulipata ushahidi mpya unaoonyesha kuwa shambulio kubwa lilikuwa likipangwa dhidi ya Rwanda,” alisema, akiongeza kuwa Kinshasa na washirika wake walihifadhi silaha kwenye uwanja wa ndege wa Goma na maeneo ya jirani.
Balozi Ngango aliendelea kusema:
“Silaha hizo hazikuwa kwa ajili ya kuwanyang’anya silaha waasi wa M23. Badala yake, zilielekezwa moja kwa moja kwa Rwanda.”
Aliongeza kuwa silaha hizo zilijumuisha maroketi, droni za kamikaze (zinazotumiwa kujitoa mhanga na kusababisha uharibifu mkubwa kwa adui), na mizinga ya masafa marefu.
Reuters iliripoti kuwa bado haijafahamika ikiwa wanadiplomasia wanaona hali hiyo kama tishio kubwa au kama M23 tayari imeshadhibiti hatari hiyo.
