Myugariro Rwatubyaye Abdul wari umaze igihe asa n’uwaburiwe irengero, yamaze kwerekeza mu ikipe ya Abu Muslim Farah Football Club yo muri Afghanistan.
Uyu musore usanzwe akinira Ikipe y’Igihugu ‘Amavubi’ yemeje ko ari umukinnyi w’iyi kipe biciye mu butumwa yanyujije ku rubuga rwe rwa Instagram.
Ni ubutumwa bwari buherekeje amafoto yashyize kuri ruriya rubuga, arimo amugaragaza ari mu myitozo.
Ni imyitozo Rwatubyaye yavuze ko yarimo yiteguriramo umukino wa kamarampaka ikipe ye izahuriramo n’iyitwa Paro FC, mu irushanwa ryitwa AFC Challenge League.
Uwo mukino uteganyijwe ku wa 12 Kanama 2025.
Mu mpera z’ukwezi gushize ni bwo Rwatubyaye wari umaze amezi atanu nta wumuca iryera yerekeje muri iriya kipe yo muri Afghanistan; igihugu kiyobowe n’Abatalibani.
Uyu musore wakiniye amakipe ya APR FC na Rayon Sports, muri Gashyantare uyu mwaka yari yatandukanye n’Ikipe ya Brera Strumica yo mu Cyiciro cya Mbere muri Macedonia ya Ruguru yari amazemo amezi atanu.
Muri Mutarama 2024, ni bwo Rwatubyaye yamenyesheje Rayon Sports FC yakiniraga ko ashaka kuyisohokamo akerekeza muri Macedonia mu ikipe yahozemo ya KF Shkupi.
Iyi kipe yatandukanye na we muri Nzeri uwo mwaka, ahita yerekeza muri Macedonia y’Amajyaruguru, atangazwa nk’umukinnyi mushya wa Brera Strumica.
Ikipe ya Abu Muslim Farah Football Club Rwatubyaye yerekejemo, yashinzwe mu 1958 ikaba ikina muri shampiyona y’Icyiciro cya Mbere muri Afghanistan izwi nka Afghan Champions League.
