Nchini Senegal, mawaziri watano waliowahi kuhudumu katika serikali ya aliyekuwa rais Macky Sall watafikishwa mahakamani hivi karibuni mbele ya Mahakama Kuu ya Haki. Alhamisi ya tarehe 8 Mei, wabunge wengi walipiga kura ya kuunga mkono kuwashtaki.
Kesi hiyo itasikilizwa katika mahakama maalum pekee inayoruhusiwa kusikiliza mashtaka dhidi ya mawaziri wa zamani na viongozi wakuu wa taifa. Mashtaka mengi yanahusiana na matumizi mabaya ya fedha za msaada wa Covid-19, isipokuwa aliyekuwa Waziri wa Sheria, anayekabiliwa na mashtaka ya rushwa.
Wanaoshtakiwa ni Moustapha Diop, Amadou Mansour Faye, Aissatou Sophie Gladima, Salimata Diop na Ismaïla Madior Fall, wote wakiwa mawaziri wa zamani katika utawala wa Macky Sall, kwa mujibu wa RFI.
Fedha hizo zilitokana na mfuko uitwao “Force Covid-19”, uliokusudiwa kusaidia familia na biashara zilizotaabika wakati wa janga, lakini sasa inadaiwa zilitumika visivyo. Ripoti ya Mahakama ya Ukaguzi ya mwaka 2023 ilisababisha Ofisi ya Mwendesha Mashtaka wa Fedha mjini Dakar kuanzisha uchunguzi.
Tangu mwaka 1960, Mahakama hii imetumika mara mbili tu: mwaka 1963 kwa kesi ya Mamadou Dia, aliyekuwa Rais wa Baraza, na mwaka 2005 kwa Idrissa Seck, aliyekuwa Waziri Mkuu, ambaye aliondolewa mashtaka baadaye.
Miongoni mwa watano hao, Ismaïla Madior Fall ndiye pekee anayetuhumiwa kwa makosa yasiyohusiana na Covid-19, ikiwemo matumizi mabaya ya fedha za umma na rushwa.
