Umuhanzi w’icyamamare muri Nigeria Adekunle Kosoko, uzwi nka Adekunle Gold, yatangaje ko we n’umugore we Simi bibarutse impanga. Iyi nkuru yishimiwe n’abatari bake, yayitangarije ku rubuga rwe rwa Snapchat ku wa kane.
Nubwo batatangaje igitsina cy’izo mpanga, abakunzi b’umuziki n’abandi bahanzi bahise bohereza ubutumwa bw’ibyishimo n’ishimwe kuri uyu muryango.
Mu kwezi kwa Ukuboza, Simi yari yashyize amashusho kuri Instagram agaragaza inda y’umugore utwite, ayaherekesha amagambo agira ati: “Biva ku mwana wanjye, bigenewe abana banjye”, byari bigaragaza ko hari undi mwana bari biteguye kwakira.
Uku kubaruka kwabaye mu byumweru bike nyuma y’uko Simi agaragaye mu gice cy’indirimbo nshya ya Adekunle Gold yitwa “My Love Is the Same”, ari nabwo benshi batangiye gukeka ko batwite.
Adekunle Gold na Simi bashyingiranywe mu 2019 nyuma y’imyaka myinshi ari inshuti kandi bakorana mu muziki. Bombi banigeze gusinyishwa na X3M Music mu ntangiriro z’umwuga wabo, bakaba bafatwa nk’umwe mu miryango y’abahanzi ikunzwe cyane muri Nigeria.
Umwana wabo w’imfura Adejare Kosoko, uzwi ku izina rya Deja, yavutse muri Gicurasi 2020. Kuri ubu, umuryango wabo wakiriye abana babiri bashya, bikomeza kuwugira munini kandi wuzuye ibyishimo.
