Kuri iki cyumweru nyuma ya saa sita, impunzi y’Umurundi witwa Joseph Minani w’imyaka 38 basanze yapfuye mu murima w’ibijumba n’imyumbati. Polisi ivuga ko imiterere y’urupfu rwe ikomeje kutamenyekana. Ariko umugore we avuga ko yishwe n’Abanyatanzaniya.
Umurambo wa Joseph Minani wavumbuwe ahagana mu ma saa yine z’ijoro hanze y’inkambi y’impunzi y’Abarundi ya Nduta muri Tanzaniya. Abenegihugu ba Tanzaniya ni bo bahamusanze.
Umunyatanzaniya wo mu mujyi wa Kumushasha, utari mu nkambi ya Nduta yagize ati: “Iruhande rw’umubiri hari imihoro ibiri, umuheto n’umufuka wuzuye imyumbati.” Imiterere y’urupfu rw’impunzi z’Abarundi ntiramenyekana.
Ariko nk’uko Abanya Tanzaniya babivuga, imirwano ikunze kuba hagati y’impunzi n’abaturage, aho amakuru agera kuri SOS Médias Burundi avuga ko impamvu nyamukuru ari ubujura mu murima, amakimbirane ashingiye ku nkwi no kutishyura imishahara y’impunzi.
Abashinzwe umutekano bakuye umurambo aho wasanzwe mbere yo kuwujyana mu bitaro by’inkambi kugira ngo umuryango we ubashe kumumenya.
Umugore wa nyakwigendera yagize ati: “Umugabo wanjye yishwe n’Abanyatanzaniya ntashoboye kumenya.” Igihe ibyago byabaga, yari kumwe n’umugabo we.
Abashakanye benshi bajya hanze y’inkambi gukora mu mirima y’Abanyatanzaniya kugira ngo babone “amafaranga azabafasha kugura ibiryo kugira ngo bongere amafaranga adahagije bahabwa.”
Impunzi zavuganye na SOS Médias Burundi zirasaba abategetsi ba Tanzaniya gushakira igisubizo cy’amakimbirane akunze kugaragara hagati y’impunzi z’Abarundi n’abaturage ba Tanzaniya, ari yo ntandaro y’ubwo bwicanyi no kuburirwa irengero.
Abapolisi bo mu karere ka Kigoma (mu majyaruguru y’uburengerazuba bwa Tanzaniya) aho inkambi ya Nduta iherereye bavuga ko byibura impunzi 13 zicwa buri mwaka ndetse n’abandi bagera kuri makumyabiri baburirwa irengero . Impamvu za politiki, umutekano muke n’amabandi ni impamvu nyamukuru z’ibi byago. Impunzi z’Abarundi zirasaba UNHCR n’abayobozi ba Tanzaniya kubarinda aho “kuduhatira gutaha”.
Nduta ni inkambi y’impunzi z’Abarundi icumbikiye abantu barenga 60.000. Benshi mu bayirimo bahunze imvururu za politiki zo 2015 zatewe n’indi manda itaravuzweho rumwe ya nyakwigendera Perezida Pierre Nkurunziza.
