Umunye-Ghana Thomas Partey ari mu gihirahiro gikomeye nyuma yo kuregwa ibikorwa bitanu byo gufata ku ngufu n’ikindi cyaha kimwe cy’ihohotera rishingiye ku gitsina.
Ibi birego Partey aregwa bikomoka ku bikorwa bivugwa ko byabaye hagati ya 2021 na 2022, aho abagore batatu batandukanye batangaje ko bahohotewe.
Polisi yo mu Bwongereza yavuze ko iperereza ryatangiye muri Gashyantare 2022 nyuma y’aho habonetse ikirego cya mbere.
Amakuru aturuka mu binyamakuru byo mu Bwongereza, arimo The Telegraph na ESPN, avuga ko Arsenal, Ishyirahamwe ry’Umupira w’Amaguru mu Bwongereza (FA) ndetse na Premier League bari bafite amakuru ajyanye n’ibi birego kuva muri Nzeri 2021, ariko ntihatangizwa iperereza rirambuye icyo gihe.
Thomas Partey w’imyaka 31 yari asigaye adafite ikipe nyuma y’uko amasezerano ye muri Arsenal arangiye tariki 30 Kamena 2025.
Ibirego bijyanye n’aya makosa bikaba byaje kwemezwa n’Ubushinjacyaha bwo mu Bwongereza nyuma yo “gusesengura dosiye yuzuye y’ibimenyetso”.
Mu kiganiro n’abanyamakuru mbere y’urugendo rwa Arsenal muri Aziya, umutoza Mikel Arteta yavuze ko “ku ijana ku ijana, ikipe ye yakurikiranye uru rubanza mu buryo bukwiye”, nubwo yirinze kugira byinshi abivugaho kuko ari urubanza ruremereye ruri imbere y’ubutabera.
Abunganira Partey mu mategeko bemeje ko yihakanye ibirego byose, kandi ko “yiteguye kwerekana ukuri no kwisobanura imbere y’urukiko”.
Biteganyijwe ko Thomas Partey azaburana bwa mbere ku wa 5 Kanama 2025 mu rukiko rwa Westminster Magistrates’ Court i Londres.
